اسلام آباد (نیوز ڈیسک) بھوجپوری فلم انڈسٹری میں ایک تازہ تنازع کھڑا ہوگیا ہے جب مشہور گلوکار و اداکار پَون سنگھ کی ایک ویڈیو سوشل میڈیا پر تیزی سے پھیل گئی۔ اس ویڈیو میں دیکھا جا سکتا ہے کہ وہ ساتھی اداکارہ انجلی راگھو کو ایک تقریب کے دوران نامناسب انداز میں چھوتے ہوئے مزاق کرتے ہیں۔
یہ واقعہ پَون سنگھ کے نئے گانے ’’سَیّاں سیوا کرے‘‘ کی تشہیری تقریب میں پیش آیا۔ وائرل فوٹیج میں انجلی راگھو، جو سنہری ساڑھی زیب تن کیے ہوئے تھیں، مداحوں سے بات کر رہی تھیں کہ اچانک پَون سنگھ نے ان کی کمر پر ہاتھ رکھ کر کہا، ’’یہاں کچھ لگا ہوا ہے۔‘‘
اس ویڈیو نے سوشل میڈیا پر شدید ردعمل پیدا کیا۔ صارفین نے پَون سنگھ کے اس رویے کو نہ صرف نامناسب بلکہ شرمناک قرار دیا اور کہا کہ اس قسم کی حرکات نہ صرف خواتین کی عزت کو مجروح کرتی ہیں بلکہ بھوجپوری انڈسٹری کی ساکھ کو بھی متاثر کرتی ہیں۔
انجلی راگھو کا مؤقف
اداکارہ انجلی راگھو نے بعد ازاں سوشل میڈیا پر لائیو آکر اپنے جذبات کا اظہار کیا۔ انہوں نے کہا:
’’یہ واقعہ میرے لیے بہت افسوسناک تھا۔ گزشتہ دو دن سے میں ذہنی دباؤ کا شکار ہوں۔ اسٹیج پر موجود مداح پَون سنگھ کو بھگوان کہہ رہے تھے، اور اس ماحول میں میرے لیے فوری ردعمل دینا ممکن نہیں تھا۔ اگر میں کسی اور جگہ ہوتی تو ضرور جواب دیتی۔ میں نے فیصلہ کیا ہے کہ اب بھوجپوری فلم انڈسٹری میں مزید کام نہیں کروں گی۔‘‘
پَون سنگھ کی معذرت
دوسری جانب پَون سنگھ نے اپنے مؤقف میں کہا:
’’میری نیت ہرگز غلط نہیں تھی۔ مصروفیات کے باعث میڈیا پر نظر نہیں رکھ سکا لیکن جیسے ہی معاملہ سامنے آیا تو بہت افسوس ہوا۔ اگر میری کسی حرکت سے انجلی کو دکھ پہنچا ہو تو میں معذرت خواہ ہوں۔‘‘
انجلی راگھو ماڈلنگ، ٹی وی اور میوزک کے شعبے میں اپنی پہچان رکھتی ہیں اور متعدد ایوارڈز بھی جیت چکی ہیں۔ تاہم، حالیہ واقعے کے بعد انہوں نے اعلان کیا ہے کہ وہ بھوجپوری انڈسٹری میں مزید کام نہیں کریں گی۔
View this post on Instagram
