لاہور (این این آئی)ایشین کرکٹ کونسل کے صدر محسن نقوی نے ایشیاء کپ 2025 کے میچز کے شیڈول کا اعلان کر دیا ہے۔سربراہ ایشین کرکٹ کونسل محسن نقوی نے سوشل میڈیا سائٹ ‘ایکس’ پر ایشین ایونٹ کے میچز کے شیڈول کا اعلان کرتے ہوئے بتایا کہ میچز 9 سے 28 ستمبر کے دوران متحدہ عرب امارات (یو اے ای) میں کھیلے جائیں گے، پاکستان اور بھارت کے درمیان ہائی وولٹیج ٹاکرا 14 ستمبر کو شیڈول کیا گیا ہے۔
ایشیا کپ 2025 میں 8 ٹیمیں حصہ لیں گی، تمام مقابلے متحدہ عرب امارات میں کھیلے جائیں گے۔شیڈول کے مطابق ایشیاکپ 2025 کا پہلا میچ 9 ستمبر کو افغانستان اور ہانگ کانگ کے درمیان کھیلا جائے گا، سپر فور مرحلے کے میچز 20 سے 26 ستمبر کے دوران جبکہ فائنل مقابلہ 28 ستمبر کو شیڈول ہے۔پاکستان اپنا پہلا میچ 12 ستمبر کو عمان کیخلاف کھیلے گا، دوسرے مقابلے میں پاکستان کا سامنا روایتی حریف بھارت سے ہوگا جبکہ قومی ٹیم 17 سمتبر کو متحدہ عرب امارات کیخلاف میدان میں اْترے گی۔گروپ اے میں پاکستان، بھارت، عمان اور یو اے کی ٹیمیں شامل ہیں۔گروپ بی میں بنگلہ دیش، افغانستان، سری لنکا اور ہانگ کانگ کی ٹیمیں شامل ہیں۔
