اسلام آباد (نیوز ڈیسک) کراچی کے جناح انٹرنیشنل ایئرپورٹ پر پرندوں سے ٹکرانے کے دو الگ الگ واقعات پیش آئے، جس کے بعد ایئرپورٹ انتظامیہ نے فوری اقدامات کا آغاز کر دیا ہے۔
ایئرپورٹ ذرائع کے مطابق پہلا واقعہ ایک غیر ملکی فضائی کمپنی کی پرواز کے ساتھ پیش آیا، جب طیارہ پرواز کے دوران ایک پرندے سے ٹکرا گیا۔ دوسرا واقعہ ایک نجی پاکستانی ایئرلائن کی فلائٹ کے ساتھ اس وقت پیش آیا جب وہ لاہور سے کراچی لینڈنگ کے مراحل میں تھی۔
اطلاعات کے مطابق متاثرہ پرواز میں 150 سے زائد مسافر موجود تھے۔ خوش قسمتی سے دونوں واقعات میں کوئی جانی نقصان نہیں ہوا۔
ایوی ایشن ذرائع کے مطابق، ڈائریکٹر جنرل ایئرپورٹس اتھارٹی نے کراچی ایئرپورٹ پر فوری طور پر فیومیگیشن (جراثیم کش اسپرے) کروانے اور پرندوں کو بھگانے کے لیے اضافی برڈ شوٹرز کی تعیناتی کی ہدایات جاری کر دی ہیں۔
ماہرین کا کہنا ہے کہ پرندوں سے طیارے ٹکرانے کے واقعات محفوظ پرواز کے لیے خطرہ بن سکتے ہیں، اس لیے ایسے علاقوں میں مسلسل نگرانی اور پرندوں کی روک تھام کے اقدامات انتہائی ضروری ہیں۔
