اسلام آباد (نیوز ڈیسک)نیشنل ڈیزاسٹر منیجمنٹ اتھارٹی (این ڈی ایم اے) نے آئندہ 48 گھنٹوں کے دوران پنجاب، خیبر پختونخوا اور سندھ کے مختلف علاقوں میں شدید بارش اور تیز ہواؤں کے خطرے کی وارننگ جاری کی ہے۔اتھارٹی کے مطابق سندھ کے کئی اضلاع میں گرج چمک کے ساتھ موسلا دھار بارش متوقع ہے۔ خاص طور پر کراچی، حیدرآباد، سکھر، تھرپارکر، بدین اور عمرکوٹ سمیت دیگر علاقوں میں موسمی صورتحال مزید بگڑ سکتی ہے۔

ادھر پنجاب کے شہروں اسلام آباد، لاہور، راولپنڈی، فیصل آباد، گوجرانوالہ اور میانوالی میں تیز ہوائیں چلنے کے ساتھ بارش کا امکان ظاہر کیا گیا ہے۔ خیبر پختونخوا کے چترال، سوات، ایبٹ آباد، مانسہرہ، پشاور، بنوں اور وزیرستان میں بھی موسلا دھار بارش کی پیشگوئی کی گئی ہے۔این ڈی ایم اے نے شہریوں کو خبردار کیا ہے کہ شدید بارشوں کے نتیجے میں شہری علاقوں میں اربن فلڈنگ جبکہ پہاڑی علاقوں میں لینڈ سلائیڈنگ کا خطرہ بڑھ گیا ہے، اس لیے متاثرہ علاقوں میں غیر ضروری سفر سے اجتناب کیا جائے۔مزید ہدایت دی گئی ہے کہ مقامی انتظامیہ اور ریسکیو ادارے الرٹ رہیں تاکہ کسی بھی ہنگامی صورتحال میں فوری اقدامات کیے جا سکیں۔