اسلام آباد (نیوز ڈیسک)امریکا سے تعلق رکھنے والے معروف سوشل میڈیا شخصیت ٹینر مارٹن، جنہوں نے پانچ برس قبل اپنی موت کی پیشگوئی کی تھی، بالآخر کینسر سے لڑتے ہوئے دنیا سے رخصت ہو گئے۔بین الاقوامی میڈیا رپورٹس کے مطابق ٹینر مارٹن امریکی ریاست یوٹاہ کے رہائشی تھے۔ سن 2020 میں، جب ان کی عمر 25 سال تھی، ڈاکٹروں نے ان میں کولوریکٹل کینسر (یعنی بڑی آنت کا کینسر) کی تشخیص کی۔ اسی وقت انہوں نے اپنی زندگی کی روزمرہ سرگرمیوں کو آن لائن دستاویزی شکل میں محفوظ کرنا شروع کر دیا تھا۔

ٹینر نے 2020 میں اعلان کیا تھا کہ وہ 5 سال بعد، یعنی اپنی 30ویں سالگرہ سے قبل دنیا سے رخصت ہو جائیں گے  اور حیرت انگیز طور پر، یہ بات درست ثابت ہوئی۔ رپورٹس کے مطابق انہیں اسٹیج فور کینسر تھا اور طویل جدوجہد کے بعد اب وہ انتقال کر گئے ہیں۔ان کے انتقال کے بعد ان کی بیوی نے ان کا ایک پیغام ویڈیو کی صورت میں سوشل میڈیا پر جاری کیا، جو انہوں نے اپنی زندگی کے آخری ایام میں ریکارڈ کیا تھا۔ ویڈیو میں ٹینر کو یہ کہتے سنا جا سکتا ہے:”اگر آپ یہ ویڈیو دیکھ رہے ہیں، تو اس کا مطلب ہے کہ میں اب اس دنیا میں نہیں رہا۔”وہ مزید کہتے ہیں:”میری زندگی آسان نہیں تھی، اور میں نے یہ ویڈیو اس دن کے لیے ریکارڈ کی تھی، جب میں خود اپنی موت کی خبر دنیا کو دے سکوں۔ میں نے پہلے بھی کسی کو ایسا کرتے دیکھا تھا، اس لیے یہ طریقہ مجھے مناسب لگا۔”ٹینر نے زندگی کو ایک خوبصورت نعمت قرار دیا اور کہا:”زندگی ایک شاندار تجربہ ہے۔ میں نے اسے بھرپور انداز سے جیا، اور آپ سب کو بھی یہی مشورہ دوں گا کہ ہر لمحے کو مکمل طور پر جئیں۔ مجھے زندگی سے محبت ہے، اور مجھے یقین ہے کہ اس کے بعد بھی ایک اور دنیا ہے۔”