اسلام آباد (نیوز ڈیسک)کراچی میں سینئر اداکارہ عائشہ خان کی فلیٹ سے کئی دن پرانی لاش ملنے کے بعد سوشل میڈیا صارفین کی جانب سے ان کے بچوں پر سخت تنقید کی جا رہی ہے۔ تاہم معروف اداکارہ بشریٰ انصاری نے اس معاملے پر وضاحت دیتے ہوئے عوام سے تحمل کا مظاہرہ کرنے کی اپیل کی ہے۔بشریٰ انصاری نے ایک ویڈیو بیان میں بتایا کہ کچھ عرصہ قبل عائشہ خان سے ایک پروجیکٹ کے دوران ان کی ملاقات ہوئی تھی، جہاں انہوں نے اپنی نجی زندگی کے بارے میں گفتگو کی تھی۔
عائشہ خان نے بتایا تھا کہ ان کے بچے بیرونِ ملک مقیم ہیں، باقاعدہ رابطے میں رہتے ہیں اور ان کا مکمل خیال رکھتے ہیں، حتیٰ کہ روانگی سے پہلے ان کے لیے درازوں میں پیسے بھی رکھ دیتے تھے۔بشریٰ کے مطابق، عائشہ خان نے واضح طور پر کہا تھا کہ وہ خود اپنے طور پر زندگی گزارنا پسند کرتی ہیں۔ وہ عبادات، مطالعے اور قریبی ہمسایوں سے میل جول میں خوش رہتی تھیں۔ انہیں بچوں کے گھروں میں رہنا پسند نہیں تھا اور وہ اپنی تنہائی کو سکون تصور کرتی تھیں۔
اداکارہ نے عوام سے درخواست کی کہ بغیر کسی مصدقہ معلومات کے عائشہ خان کے بچوں پر تنقید نہ کریں، کیونکہ وہ خود بھی والدہ کے اچانک انتقال پر شدید صدمے سے گزر رہے ہوں گے۔ انہوں نے مزید کہا کہ ہمیں چاہیے کہ ہم مرحومہ کے لیے دعائے مغفرت کریں اور ان کی یادوں کو عزت سے یاد رکھیں۔خیال رہے کہ عائشہ خان کی لاش گلشنِ اقبال کے ایک فلیٹ سے برآمد ہوئی تھی، جہاں وہ تنہا مقیم تھیں۔ ان کی وفات کو ایک ہفتہ گزر چکا تھا، جب ہمسایوں کو ان کی خیریت کی فکر لاحق ہوئی اور پولیس کو اطلاع دی گئی، جس کے بعد ان کی لاش فلیٹ سے ملی۔
