اسلام آباد (نیوز ڈیسک) بالی ووڈ اداکارہ کرشمہ کپور کے سابق شوہر سنجے کپور کی زندگی کا اچانک خاتمہ ہو گیا۔ بھارتی میڈیا کے مطابق، سنجے کپور برطانیہ میں پولو میچ کے دوران دل کا دورہ پڑنے سے چل بسے۔

رپورٹس کے مطابق، کھیل کے دوران وہ اچانک زمین پر گر پڑے۔ فوری طور پر انہیں قریبی اسپتال منتقل کیا گیا، تاہم وہ جانبر نہ ہو سکے۔ ذرائع کا کہنا ہے کہ میچ کے دوران ان کے منہ میں شہد کی مکھی داخل ہو گئی، جس سے انہیں شدید الرجی ہوئی، اور یہی کیفیت ممکنہ طور پر دل کا دورہ بن گئی۔سنجے کپور، معروف آٹو پارٹس کمپنی “سونا کامسٹار” کے چیئرمین اور نان ایگزیکٹو ڈائریکٹر تھے۔

کمپنی کی جانب سے ان کے انتقال کی تصدیق کرتے ہوئے ایک بیان جاری کیا گیا جس میں کہا گیا:”ہم گہرے دکھ اور افسوس کے ساتھ اعلان کرتے ہیں کہ ہمارے چیئرمین اور نان ایگزیکٹو ڈائریکٹر، مسٹر سنجے جے کپور، 12 جون 2025 کو انگلینڈ میں 53 سال کی عمر میں حرکت قلب بند ہونے کے باعث وفات پا گئے۔”سنجے کپور کی اچانک وفات پر ان کے دوست، اہلِ خانہ اور کاروباری حلقے شدید غم میں مبتلا ہیں۔ ایک ٹوئٹ میں انہوں نے حال ہی میں کسی اور سانحے پر افسوس کا اظہار کرتے ہوئے لکھا تھا: “میری دعائیں اور ہمدردی ان تمام متاثرہ خاندانوں کے ساتھ ہیں، اللہ انہیں صبر عطا فرمائے۔”