اسلام آباد (نیوز ڈیسک) ٹک ٹاکر ثناء یوسف کا قاتل مقتولہ کا فون بھی ساتھ لے گیا اور یہی اس کی گرفتاری کی وجہ بنا۔نجی ٹی وی ’’دنیا نیوز‘‘ کے پروگرام’’ نقطۂ نظر ‘‘میں گفتگو کرتے ہوئے رپورٹر عابد تنولی نے بتایا کہ قتل ہونے کے بعد پولیس موقع پر پہنچی اور تفتیش کو جدید طریقۂ کار کے تحت آگے بڑھانا شروع کیا۔ مقتولہ کے موبائل فون کی سی ڈی آر نکلوائی گئی تو 37 لوگوں کی 300 کالز کو ٹریس کیا گیا۔

انہوں نے بتایا کہ ملزم موبائل فون بھی اپنے ساتھ لے گیا تھا اور یہی اس کی غلطی ثابت ہوئی۔ پولیس پہلے 12 گھنٹوں کے دوران ہی اس نتیجے پر پہنچ گئی کہ اصل ملزم فیصل آباد فرار ہوچکا ہے، کیونکہ ملزم عمر اور مقتولہ ثنا ءکے موبائلز کی کوکیشن ایک ہی جگہ کی آر ہی تھی۔ بعد ازاں اسے گرفتار کرلیا گیا۔سینئر صحافی مجیب الرحمان شامی نے اس صورتحال پر تبصرہ کرتے ہوئے کہا کہ ملزم احتیاطی تدبیر کے طور پر مقتولہ کا موبائل لے کر گیا کہ کہیں اس کی موبائل میں کوئی تصویر وغیرہ نہ بن گئی ہو لیکن وہی موبائل اس کی گرفتاری کا سبب بن گیا۔