موتیہاری(نیوز ڈیسک) بہار میں مشرقی چمپارن ضلع کے موتیہاری اسمبلی حلقہ کے لکھورا میں منعقد انتخابی ریلی میں اسٹیج پر بیٹھے راشٹریہ جنتا دل (آر جے ڈی) کے صدر لالو پرساد یادو پر پنکھا گر گیا جس سے ان کے ہاتھ میں معمولی چوٹ آئی۔شکایت پر الیکٹریشن کے خلاف مقدمہ درج کر لیا گیا۔ انڈین ایکسپریس کی رپورٹ کے مطابق مسٹر یادو راشٹریہ جنتا دل امیدوار ونود شریواستو کے حق میں انتخابی ریلی سے خطاب کرنے کے لئے اسٹیج پر بیٹھے ہی تھے کہ شامیانے کی چھت پر لگاپنکھا گر گیا۔ پنکھے کا بلیڈ یادو کے ہاتھ اور پاوں میں لگا۔جس سے مسٹر یادو کے ہاتھ میں ہلکی چوٹ آئی۔ مسٹر یادو اس وقت چائے پی رہے تھے، پنکھے کا بلیڈ ہاتھ میں لگنے سے چائے ان کے کرتے پر گر گئی۔زخمی ہونے پر مسٹر یادو غصے میں آگئے اور انہوں نے وہاں سکیورٹی کو پھٹکارا اور پولیس سپرنٹنڈنٹ جتیندر رانا کو فون کر کے شکایت کی۔ جس پر ایس پی نے الیکٹریشن کے خلاف ایف آئی آر درج کرنے کا حکم دیدیا۔