لدھیانا(نیوز ڈیسک)قوت گویائی اور سماعت سے محروم بھارتی لڑکی گیتا کے بارے میں اس کی ماں کا کہنا ہے کہ گیتا نہ صرف شادی شدہ ہے بلکہ اس کا ایک بیٹا بھی ہے، جبکہ اس کے بھائی کا کہنا ہے کہ گیتا کا اصل نام ہرا ہے۔بھارتی پنجاب کے شہر لدھیانا میں مقیم گیتا کی ماں دیوی کا کہنا ہے کہ جس وقت گیتا لاپتا ہوئی تھی ، اس وقت اس کی عمر 17 یا 18 برس تھی اور انہوں نے اس بارے میں پولیس میں رپورٹ بھی درج کرائی تھی۔دیوی نے ایک پرانی تصویر بھی دکھائی جس میں گیتا ایک بچے کو گود میں اٹھائے ہوئے ہے جس کے حوالے سے انھوں نے دعویٰ کیا کہ یہ گیتا اور اس کے بیٹے کی تصویر ہے اور جب گیتا لاپتہ ہوئی تھی تو اس کے بیٹے کی عمر تین یا چار ماہ کی تھی اور اس وقت وہ دس برس کا ہوچکا ہے۔ادھر گیتا کے بھائی ونود کمار نے بھی دعویٰ کیا ہے کہ اس کی بہن کا اصل نام ہراہے اور وہ دس برس پہلے لاپتا ہوگئی تھی۔