کراچی (نیوز ڈیسک) ان افراد کے لیے جو کم قیمت میں استعمال شدہ کمپیوٹر، لیپ ٹاپ یا پرنٹرز خریدنا چاہتے ہیں، خوشخبری ہے کہ حکومت نے ان اشیاء کی درآمد پر لاگو کسٹم ویلیو میں نمایاں کمی کا اعلان کر دیا ہے۔
تفصیلات کے مطابق ڈائریکٹوریٹ جنرل آف کسٹمز ویلیوایشن نے پرانی اور استعمال شدہ آئی ٹی مصنوعات جیسے کمپیوٹرز، لیپ ٹاپس اور پرنٹرز کی درآمدات پر نئے ویلیوایشن ریٹس متعارف کرا دیے ہیں، جو کہ 2025 کے ویلیوایشن رولنگ 2000 کے تحت جاری کیے گئے ہیں۔
ذرائع کے مطابق اس فیصلے سے قبل تقریباً ایک سال تک عالمی قیمتوں، ٹیکنالوجی کی قدر میں کمی اور مارکیٹ کے حالات کا جامع جائزہ لیا گیا۔ کسٹمز ڈیپارٹمنٹ کا کہنا ہے کہ اس تبدیلی کا مقصد مارکیٹ میں موجود پرانی ٹیکنالوجی کی کم ہوتی قیمتوں سے ہم آہنگ ہونا ہے۔
نئی ویلیوایشن میں واضح کیا گیا ہے کہ کم شدہ قیمتیں نہ صرف ان آلات پر لاگو ہوں گی بلکہ ان کے پرزہ جات پر بھی اثرانداز ہوں گی، یعنی لیپ ٹاپ، کمپیوٹرز، پرنٹرز اور ان کے تمام متعلقہ پرزہ جات کم کسٹم ویلیو پر درآمد کیے جا سکیں گے۔
درآمدکنندگان کے لیے یہ ایک بڑا ریلیف سمجھا جا رہا ہے، جو پہلے سے موجود ویلیوایشن پر بھاری ڈیوٹیز کی وجہ سے مشکلات کا شکار تھے۔ اب وہ باآسانی کم قیمت پر استعمال شدہ ٹیکنالوجی درآمد کر سکیں گے۔
ٹیکنالوجی کے ماہرین اور کاروباری طبقہ اس تبدیلی کا خیرمقدم کر رہے ہیں۔ ان کے مطابق اس اقدام سے نہ صرف درآمدی لاگت میں کمی آئے گی بلکہ کم آمدنی والے صارفین کے لیے معیاری ٹیکنالوجی تک رسائی بھی آسان ہو جائے گی، جو مقامی مارکیٹ میں مسابقت کو فروغ دے گی۔
