اسلا م آباد (نیوز ڈیسک) بھارت کی ریاست اتر پردیش میں ایک غیر معمولی واقعہ سامنے آیا ہے جہاں ایک خاتون مبینہ طور پر اپنی بیٹی کے سسر کے ساتھ گھر سے فرار ہو گئی۔ یہ واقعہ علی گڑھ میں اس وقت خبروں کی زینت بنا جب خاتون کے شوہر نے معاملے کی شکایت پولیس میں درج کرائی۔بھارتی میڈیا رپورٹس کے مطابق خاتون کے شوہر سنیل کمار، جو پیشے کے لحاظ سے ٹرک ڈرائیور ہیں، نے بتایا کہ وہ مہینے میں صرف دو بار گھر آتے تھے اور باقی دنوں میں ان کی اہلیہ گھر پر اکیلی ہوتی تھی۔

ان کا کہنا ہے کہ انہی دنوں میں بیوی اپنی بیٹی کے سسر، شیلندرا، کو گھر بلاتی تھی۔خاتون کے بیٹے نے بھی اس بات کی تصدیق کی کہ جب بھی بہن کا سسر گھر آتا تھا، ان کی ماں انہیں کسی بہانے دوسرے کمرے میں بھیج دیتی تھی۔ اس کے مطابق ان کی والدہ اور شیلندرا اکثر اوقات خفیہ ملاقاتیں کرتے تھے۔مقامی ذرائع کا کہنا ہے کہ 43 سالہ خاتون کے چار بچے ہیں اور اس کی بیٹی کی شادی 2022 میں ہوئی تھی۔ شادی کے بعد ہی مبینہ طور پر خاتون اور اس کے داماد کے والد کے درمیان تعلقات قائم ہوئے، جو بعد میں اتنے بڑھ گئے کہ دونوں نے مل کر فرار ہونے کا فیصلہ کیا۔

پڑوسیوں کے مطابق شیلندرا رات کے پچھلے پہر چپکے سے خاتون کے گھر آتا تھا اور صبح سویرے واپس چلا جاتا تھا۔ سنیل کمار نے اس واقعے پر سخت ردعمل دیتے ہوئے شیلندرا کے خلاف مقامی تھانے میں باقاعدہ شکایت بھی درج کرا دی ہے۔واقعے نے علاقے میں سنسنی پھیلا دی ہے اور پولیس نے معاملے کی تفتیش شروع کر دی ہے تاکہ دونوں کو تلاش کیا جا سکے اور حقیقت سامنے لائی جا سکے۔