اسلام آباد (نیوز ڈیسک)معروف یوٹیوبر رجب بٹ ان دنوں مشکلات کا سامنا کر رہے ہیں۔ حال ہی میں ان پر 295 نامی پرفیوم لانچ کرنے پر مذہبی جذبات مجروح کرنے کا الزام لگا، جس کے بعد وہ سعودی عرب روانہ ہو گئے اور عمرہ ادا کرنے میں مصروف ہو گئے۔ تاہم، ان کا یہ فیصلہ بھی تنازعات سے بچ نہ سکا۔
عمرہ کے دوران، رجب بٹ اور ان کے اہلِ خانہ کو صفا اور مروہ کی سعی کے دوران وہیل چیئرز پر بیٹھے دیکھا گیا، حالانکہ وہ بظاہر صحت مند اور جوان نظر آ رہے تھے۔ اس پر سوشل میڈیا صارفین نے سوالات اٹھائے کہ کیا واقعی انہیں وہیل چیئرز کی ضرورت تھی، یا یہ عمرہ کی سہولت کا غیر ضروری استعمال تھا؟
سوشل میڈیا پر گردش کرنے والی ان کی ویڈیوز اور تصاویر پر شدید تنقید کی جا رہی ہے۔ ایک صارف نے تبصرہ کیا: “کیا یہ سب معذور ہیں؟” جبکہ ایک اور نے لکھا: “جوان اور تندرست افراد کو وہیل چیئر کا استعمال نہیں کرنا چاہیے، کیونکہ یہ دوسروں کے لیے مشکلات پیدا کرتا ہے۔”
ایک اور تبصرے میں کہا گیا: “دنیا بھر میں گھوم پھر سکتے ہیں، لیکن جب دین کے لیے چلنے کا وقت آیا تو وہیل چیئر استعمال کر لی؟” صارفین نے اس رویے کو عمرہ کی سہولت کا غلط استعمال قرار دیا اور سخت الفاظ میں تنقید کی۔
