اسلام آباد (نیوز ڈیسک) بینگلورو کے کیمپے گوڑا انٹرنیشنل ایئرپورٹ پر سونا اسمگل کرنے کی کوشش کرنے پر کنڑ فلموں کی مشہور اداکارہ رانیا راؤ کو گرفتار کر لیا گیا۔ ابتدائی تحقیقات میں اداکارہ نے دعویٰ کیا کہ وہ بلیک میلنگ کا شکار ہو کر سونا اسمگل کرنے پر مجبور ہوئیں۔گرفتاری کے بعد، ڈائریکٹوریٹ آف ریونیو انٹیلیجنس (ڈی آر آئی) کی ٹیم نے ان کی رہائش گاہ، نندوانی مینشن، لاویل روڈ پر چھاپہ مارا، جہاں سے 2.67 کروڑ روپے کی نقدی اور 2.06 کروڑ روپے مالیت کے سونے کے زیورات برآمد ہوئے۔ مزید تفتیش کے دوران ان کے گھر سے تین بڑے ڈبے بھی تحویل میں لیے گئے۔

مجموعی طور پر کیس میں 17.29 کروڑ روپے کے اثاثے ضبط کیے گئے۔رانیا راؤ دبئی سے ایمریٹس فلائٹ کے ذریعے بینگلورو پہنچیں اور ایئرپورٹ پر سیکیورٹی چیک سے بچنے کی کوشش کی۔ ان کے ہمراہ پولیس کانسٹیبل بسوراجو بھی موجود تھا، جس پر شبہ ہے کہ اس نے اداکارہ کو ایئرپورٹ سے نکلنے میں مدد دی۔ تاہم، ڈی آر آئی پہلے ہی ان کی سرگرمیوں پر نظر رکھے ہوئے تھی اور جیسے ہی وہ سونے کے ساتھ باہر نکلنے لگیں، انہیں موقع پر ہی گرفتار کر لیا گیا۔ تلاشی کے دوران ان کی جیکٹ سے 14.8 کلو گرام غیر ملکی سونا برآمد ہوا، جس کی مالیت تقریباً 12.56 کروڑ روپے بتائی جا رہی ہے۔رانیا راؤ کو مزید تفتیش کے لیے ناگاوارا میں واقع ڈی آر آئی کے دفتر منتقل کیا گیا۔

وہ کنڑ اور تمل فلموں میں کام کر چکی ہیں اور کرناٹک سٹیٹ پولیس ہاؤسنگ کارپوریشن کے ڈی جی پی، کے رام چندر راؤ کی سوتیلی بیٹی ہیں۔ تحقیقات میں یہ بھی سامنے آیا کہ اداکارہ حالیہ مہینوں میں اپنے شوہر جتن کے ساتھ دبئی کے متعدد دورے کر چکی ہیں، حالانکہ ان کا وہاں کوئی کاروبار یا خاندانی تعلق نہیں پایا گیا۔مزید انکشاف ہوا کہ ایئرپورٹ پر متعدد مواقع پر پولیس اہلکاروں کی مدد سے وہ سیکیورٹی چیک سے بچتی رہی ہیں۔ ان کے غیر ملکی دوروں کو بھی تفتیش کا حصہ بنا لیا گیا ہے، جبکہ ان کے شوہر جتن سے بھی جلد پوچھ گچھ کیے جانے کا امکان ہے۔عدالتی کارروائی کے بعد، رانیا راؤ کو 14 دن کے لیے جوڈیشل کسٹڈی میں بھیج دیا گیا ہے اور اس وقت وہ پرپنا اگراہارا جیل کی قرنطینہ سیل میں قید ہیں۔