اسلام آباد (نیوز ڈیسک) بالی وڈ کے معروف مزاحیہ اداکار اور لیجنڈری فنکار گووندا اور ان کی اہلیہ سنیتا آہوجا ان دنوں اپنی شادی کے اختتام کے حوالے سے خبروں میں چھائے ہوئے ہیں۔ تین دہائیوں پر محیط ازدواجی زندگی کے بعد سنیتا آہوجا نے طلاق لینے کا فیصلہ کر لیا ہے، اور ان کے وکیل کے مطابق، وہ چھ ماہ قبل ہی قانونی کارروائی کا آغاز کر چکی تھیں۔
اداکار گووندا، جو ایک دور میں بالی وڈ کے سپر اسٹار سمجھے جاتے تھے، کافی عرصے سے فلمی دنیا میں زیادہ سرگرم نہیں ہیں۔ تاہم، بھارتی میڈیا رپورٹس کے مطابق، ان کی مجموعی دولت پر اس کا کوئی خاص اثر نہیں پڑا، کیونکہ وہ اپنے شاندار کیریئر کے دوران بے حد دولت کما چکے ہیں۔
نیوز 18 کی ایک رپورٹ کے مطابق، گووندا کے کل اثاثوں کی مالیت اس وقت تقریباً 170 کروڑ روپے ہے۔ اگر وہ کسی فلم میں کام کریں تو ان کی فیس 5 سے 6 کروڑ روپے ہوتی ہے، جبکہ کسی برانڈ کے اشتہار میں کام کرنے کے لیے وہ 2 کروڑ روپے چارج کرتے ہیں۔
اداکار کے پاس متعدد قیمتی جائیدادیں ہیں، جن میں جوہو میں واقع ان کا شاندار بنگلہ شامل ہے، جس کی مالیت 16 کروڑ روپے سے زائد بتائی جاتی ہے۔ اس کے علاوہ، ان کی رہائش گاہیں رویا پارک اور مدھ آئی لینڈ میں بھی موجود ہیں۔
لگژری گاڑیوں کے حوالے سے بھی گووندا کی کلیکشن متاثر کن ہے، ان کے پاس کئی مہنگی گاڑیاں موجود ہیں، جن کی قیمتیں 64 لاکھ اور 43 لاکھ روپے کے لگ بھگ ہیں۔
