راولپنڈی (این این آئی)چیمپیئنز ٹرافی کے راولپنڈی میں کھیلے جانیوالے بنگلا دیش اور نیوزی لینڈ کی ٹیموں کے درمیان میچ میں ایک تماشائی گرائونڈ میں داخل ہوگیا جس پر سیکیورٹی اہلکاروں کی دوڑیں لگ گئیں۔ذرائع کے مطابق عبدالقیوم نامی تماشائی کا تعلق فتح جنگ اٹک سے ہے۔
عبدالقیوم ایک ہزار روپے کا ٹکٹ خرید کر میرا بخش انکلوژر میں میچ دیکھ رہا تھا جس کے بعد وہ یاسرعرفات انکلوژر میں پہنچا اور سیکیورٹی حصار توڑ کر جنگلہ کراس کر کے میدان میں دوڑ آیا۔عبد القیوم نے نیوزی لینڈ کے بلے باز لیتھم کو گلے لگایااس موقع پر سیکیورٹی اہلکار پکڑنے کی کوشش کرتے رہے لیکن وہ پکڑائی نہ دیا۔ کھلاڑی سے ملنے کے بعد تماشائی پر سیکیورٹی اہلکاروں نے قابو کرلیا۔تماشائی کو اسٹیڈیم سے باہر لے جاکر پوچھ گچھ کے بعد مزید جانچ پڑتال کیلئے تھانہ نیوٹائون منتقل کردیا گیا ہے ۔پولیس کے مطابق تماشائی سے مزید چھان بین جاری ہے۔
