دوحہ(این این آئی)قطری وزیر اعظم شیخ محمد بن عبدالرحمن بن جاسم الثانی نے اعلان کیاہے کہ اسرائیل اور حماس کے درمیان جنگ بندی کا معاہدہ طے پا گیا ہے اور غزہ میں قید اسرائیلی یرغمالیوں اور فلسطینیوں قیدیوں کے تبادلے کا عمل آئندہ اتوار کو ہوگا۔غیرملکی خبررساں ادارے کے مطابق وزیر اعظم نے ایک پریس کانفرنس سے خطاب میں کہاکہ قطر، مصر اور امریکہ کو غزہ کی پٹی کے تنازعے کیلئے دونوں فریقوں کیلئے مشترکہ ثالثی کی کوششوں کی کامیابی کا اعلان کرتے ہوئے خوشی ہو رہی ہے،قیدیوں اور یرغمالیوں کے تبادلے اور پائیدار امن کی طرف واپسی کے حوالے سے ایک معاہدے تک پہنچنے میں کامیابی ملی ہے۔
قطری وزیراعظم نے اس بات کی تصدیق کی کہ حماس پہلے مرحلے میں 33قیدیوں کو رہا کرے گی، غزہ معاہدے میں امداد کی فراہمی اور ہسپتالوں کی بحالی شامل ہے۔شیخ محمد بن عبدالرحمن الثانی نے کہا کہ پہلا مرحلہ 42دن تک جاری رہے گا جس میں جنگ بندی ہوگی اور اس میں اسرائیلی افواج کا مشرق کی طرف انخلا بھی ہوگا۔ قطر ی وزیراعظم نے تمام فریقوں سے اپیل کی کہ وہ غزہ معاہدے پر عمل درآمد کا عزم کریں۔
