نئی دہلی (این این آئی)نئی دہلی کی عدالت نے بالی ووڈ کے مشہور اداکار دھرمندر اور دو دیگر افراد کو دھوکہ دہی کے کیس میں طلب کر لیا ہے۔ بھارتی میڈیا کی رپورٹ کے مطابق یہ کیس گرم دھرم ڈھابہ فرنچائز سے متعلق ہے۔ شکایت کنندہ، دہلی کے تاجر سشیل کمار کے وکیل ڈی ڈی پانڈے نے بتایا کہ ان کے موکل کو فرنچائز میں سرمایہ کاری کے لیے راغب کیا گیا تھا۔

عدالت کے جج یشدیپ چہل نے 5 دسمبر کو جاری کردہ حکم میں کہا کہ شواہد کے مطابق ملزمان کے خلاف دھوکہ دہی اور مجرمانہ سازش کے الزامات ثابت ہوتے ہیں۔ عدالت نے ملزمان کو 20 فروری کو پیش ہونے کا حکم دیا ہے۔ درج شکایت میں بتایا گیا ہے کہ اپریل 2018 میں ملزمان نے دھرمندر کے نمائندے کی حیثیت سے سشیل کمار کو نئی دہلی کے علاقے میں ایک ڈھابہ فرنچائز کھولنے کی پیشکش کی۔ سشیل کمار نے ستمبر 2018 میں 17.70 لاکھ روپے کا چیک دیا، لیکن اس کے بعد ملزمان نے ان سے رابطہ ختم کر دیا اور رقم لے کر قرار ہوگئے۔ عدالت نے شواہد کی بنیاد پر کہا کہ ملزمان نے دھرمندر کی جانب سے معاملہ آگے بڑھایا اور فراڈ کے الزامات کی تائید کرنے والے دستاویزات بھی موجود ہیں جس کی بنیاد پر سینئر اداکار کو عدالت میں طلب کیا گیا ہے۔تاہم اس حوالے سے اب تک دھرمندر یا ان کے اہل خانہ کی جانب سے کوئی بیان سامنے نہیں آیا ہے۔