لاہور ( این این آئی) پنجاب کے محکمہ خزانہ نے تین طرز کی پنشن میں سالانہ اضافہ ختم کردیا جو سرکاری ملازمین کیلئے بڑا دھچکا ثابت ہوگا۔پنشن میں اضافے پر بندش کا آغاز دسمبر 2024ء سے ریٹائر ہونے والے سرکاری ملازمین پر ہو گیا۔

سیکرٹری خزانہ مجاہد شیر دل نے تمام انتظامی سیکرٹریزاور سربراہوں کو مراسلہ بھیج دیا۔محکمہ خزانہ کے 2015ء میں جاری مراسلہ کے پیراگراف ون کے تحت جاری پنشن میں اضافہ جبکہ 2011ء میں جاری کردہ مراسلہ کے پیراگراف ٹو کے تحت جاری اضافہ بھی ختم کردیا گیا۔اسی طرح فنانس ڈیپارٹمنٹ کے2022ء میں جاری لیٹر کے پیرا گراف ون کے تحت جاری پنشن میں اضافہ ختم کردیا گیا۔ سیکرٹری خزانہ نے مراسلے میں ہدایت کی کہ تمام محکمے اور ادارے 2دسمبر2024ء کے نئے مراسلے کے تحت پنشن میں اضافہ روکنے کیلئے دستاویزی اقدامات کریں۔