دبئی(نیوزڈیسک) ابوظہبی میں سیریز کے پہلے ٹیسٹ سے قبل قومی ٹیم کے نائب کپتان اظہر علی کی میچ میں شرکت مشکوک ہوگئی ہے۔دوسری جانب انگلینڈ کی ٹیم کو بھی اوپننگ مسائل نے گھیر لیا۔ تفصیلات کے مطابق پاکستان اے اور انگلینڈ الیون کی ٹیموں کے درمیان دوسرا پریکٹس میچ بھی ڈرا ہوگیا۔لیکن پہلے ٹیسٹ میں کپتان ایلسٹر کک کے ساتھ اوپننگ کون کرے گا۔ یہ پریشانی اب بھی انگلش ٹیم کو درپیش ہے۔انگلینڈ نے دوسرے میچ میں معین علی اور ایلکس ہیلز کو بطور اوپنر آزمایا لیکن دونوں کھلاڑی توقعات پر پورا نہ اترسکے۔معین علی کو میچ میں دوسری بار بھی بیٹنگ کیلئے بھیجا گیا لیکن نتیجہ خاص نہ نکلا۔ اس کے باوجود تیرہ اکتوبر سے ابوظہبی میں شروع ہونے والے ٹیسٹ کیلئے معین علی سے اوپننگ کرائے جائے جانے کا امکان ہے۔دوسری جانب پاکستان کرکٹ ٹیم کی بھی پریشانی بڑھ گئی ہے۔نائب کپتان اظہر علی کی پاؤں میں چوٹ ابھی تک ٹھیک نہیں ہوئی۔ جس کے باعث ان کی پہلے ٹیسٹ میں شرکت مشکوک ہے۔