کراچی (نیوز ڈیسک) بھارتی اخبار نے اپنی تجزیاتی رپورٹ میں کہا ہے کہ پاکستان پیپلز پارٹی ملک میں اپنی بقاءکی جنگ میں مصروف ہے ، بعض طاقتور حلقے پیپلز پارٹی کو پسند نہیں کرتے جبکہ قومی پرست جماعتیں بھی ’بھٹو کرشمے ‘ کے خاتمے کی منتظر ہیں۔ بھارتی اخبار ”انڈین ایکسپریس “ نے اپنی ایک تازہ رپورٹ میں پیپلز پارٹی اور اس کے رہنماوں سے متعلق تمام سیاسی پہلووں کو اجاگر کیا ہے۔ ” کیا پیپلز پارٹی آخری سانسیں لے رہی ہے“ کے عنوان سے رپورٹ میں صوبائی سطح کی سیاسی صورتحال کا جائزہ لیتے ہوئے لکھا گیا ہے کہ ” ملک کے کچھ طاقتور حلقے پیپلز پارٹی کو پسند نہیں کرتے، طالبان سمجھتے ہیں کہ ان کی بقاءاور کامیابی پیپلزپارٹی کے زوال سے منسلک ہے جبکہ کراچی میں مقیم افراد خاص کر مہاجروں کی اکثریت پی پی پی کو ووٹ نہیں دیتی لیکن اندرون سندھ وہ اضلاع جو پہلے پاکستان پیپلز پارٹی کے پرستار تھے آج ان کی سوچ دوسرے زاویے کی جانب بڑھ رہی ہے جس سے پی پی پی کے ووٹ بینک کو خطرہ لاحق ہے جبکہ سندھی “سوشلسٹ” اور قوم پرست جماعتیں ’بھٹو کرشمے‘ کے خاتمے کی منتظر ہیں۔