لاہور (نیوزڈیسک) لاہور ہائیکورٹ نے عدالتی احکامات کے باوجود متحدہ قومی موومنٹ کے قائد الطاف حسین کی خبریں نشر اور شائع کرنے پر چیئرمین پمرا کو 16اکتوبر کو طلب کرلیا ۔ گزشتہ روز لاہور ہائیکورٹ کے جسٹس مظاہر علی اکبر نقوی کی سربراہی میں تین رکنی فل بینچ نے الطاف حسین کے خلاف ایک نوعیت کی مختلف درخواستوں کی سماعت کی جس میں اشتعال انگیز تقاریر کرنے پر ایم کیو ایم کے قائد کےخلاف غدرداری کامقدمہ درج کرنے کی استدعا کی گئی۔ سماعت کے دوران درخواست گزار عبداللہ ملک کی جانب سے اظہر صدیق ایڈووکیٹ نے متفرق درخواست میں موقف اختیار کیا کہ عدالتی پابندی کے باوجود پانچ اکتوبر کو الطاف حسین کے خلاف منی لارڈنگ کیس کی خبریں نشر اور شائع کی گئی اس پر چیئرمین پمرا کےخلاف کارروائی کی جائے۔ الطاف حسین کی وکیل عاصمہ جہانگیر نے سپریم کورٹ میں مصروفیات کی وجہ سے پیش نہیں ہوئیں اور ان کی جانب سے التواکی درخواست کی گئی۔فاضل عدالت نے چیئرمین پمرا کو 16اکتوبر کو طلب کرتے ہوئے کیس کی سماعت ملتوی کر دی۔