اسلام آباد(این این آئی)سیاہی کا ذخیرہ ختم ہونے سے پاسپورٹ پرنٹنگ بحران پھر شدت اختیار کرگیا ،ڈی جی پاسپورٹ نے کسٹمز حکام کوسیاہی کی کھیپ فوری کلیئر کرنے کیلئے تعاون کی درخواست کردی۔ذرائع کے مطابق لیمی نیشن پیپر کی کمی کے بعد سیاہی کا ذخیرہ ختم ہونے سے پاسپورٹ پرنٹنگ بحران ایک بار پھر شدت اختیار کرگیا ہے۔

متعلقہ کمپنی کی جانب سے تاخیر سے سیاہی بھجوانے کے باعث بحرانی صورتحال پیدا ہوئی جبکہ پاسپورٹس کی چھپائی کیلئے سیاہی کی ایک کھیپ 28جولائی کو اسلام آباد پہنچے گی۔ڈی جی پاسپورٹ کی جانب سے کسٹمز حکام کو خط لکھا گیا ہے جس میں سیاہی کی کھیپ فوری کلیئر کرنے کیلئے تعاون کی درخواست کی گئی ہے۔خط میں لکھا گیاکہ فنڈز کی کمی، کسٹم ڈیوٹی اور ٹیکسوں کی عدم ادائیگی کے باعث کسٹم کھیپ فوری کلیئر نہیں کرتا ، کھیپ بروقت کلیئر نہ ہونے سے پاسپورٹس کی پیداواری صلاحیت کو برقراررکھنا مشکل ہے۔28جولائی کو آنے والی سیاہی کی کھیپ کو ترجیحی بنیاد پر کلیئر کیا جائے۔ڈی جی کی جانب سے خط میں لکھا گیا کہ پاکستان کسٹمز موخر ادائیگی کی بنیاد پر سیاہی کی کھیپ فوری کلئیر کرے۔