لاہور (نیو ز ڈیسک ) آفریدی جیسے کھلاڑی پر اعتماد نہیں کیا جا سکتا جو سال میں ایک بار پرفارم کرتا ہو، معلوم نہیں پی سی بی ان سے توقعات وابستہ کیوں رکھتا ہے۔ آفریدی سے کئی دوسرے پلیئرز کی کارکردگی بہترین ہے اور اگر پی سی بی نے ورلڈ ٹی ٹونٹی کپ سے انہیں نظرانداز کیا تو یہ بڑی غلطی ہو گی۔ان خیالات کا اظہار سابق ٹیسٹ کرکٹر سرفراز نواز نے اپنے ایک انٹرویو میں کیا-انہوں نے کہا کہ اگر شاہد آفریدی کو 2016ءمیں شیڈول ٹی ٹونٹی ورلڈ کپ کیلئے ٹیم کا کپتان نہ بنایا گیا ہوتا تو انہیں سکواڈ میں جگہ بنانے کیلئے سرتوڑ کوشش کرنا پڑتی، انفرادی طور پر ان کی کارکردگی زیرو ہے اور وہ ٹی ٹونٹی سکواڈ میں شامل ہونے کے حقدار نہیں، بھارت کے خلاف سیریز کھیلنے کی سوچ کو ختم کر کے آگے بڑھنے کی ضرورت ہے کیونکہ کئی دوسری بہترین ٹیمیں پاکستان کے خلاف کھیلنے کے انتظار میں ہیں۔ پاکستانی ٹیم نے حال ہی میں زمبابوے کو ٹی ٹونٹی سیریز میں وائٹ واش کیا تھا تاہم آفریدی کی گیند اور بلے کے ساتھ کارکردگی مایوس کن رہی تھی۔سرفراز نواز نے کہا کہ یونس خان ون ڈے کرکٹ کھیلنے کے حقدار ہیں کیونکہ وہ وکٹ پر زیادہ دیر ٹھہرنا جانتے ہیں جبکہ دوسرے پلیئرز ایسا نہیں کرتے۔