نیویارک(این این آئی)فیس بک کے بانی مارک زوکر برگ نے کہا ہے کہ ان کی کمپنی خلا میں سیٹلائٹ لانچ کرنے جا رہی ہے جس سے افریقہ کے دور دراز کے علاقوں کو انٹرنیٹ کی سہولت دستیاب ہوگی۔میڈیارپورٹس کے مطابق فیس بک اپنا پہلا سیٹلائٹ فرانس کی خلائی کمپنی یوٹیلسیٹ کی شراکت میں آئندہ سال 2016 میں لانچ کرنے کا ارادہ رکھتی ہے۔مارک زوکربرگ نے اپنے ایک فیس بک پوسٹ میں کہاکہ ہم پوری دنیا کوجوڑنے کے لیے کام کرتے رہیں گے خواہ اس کے لیے ہمیں اپنے سیارے (زمین) کے باہر ہی کیوں نہ دیکھنا پڑے۔یہ پروجیکٹ فیس بک کے انٹرنیٹ ڈاٹ او آر جی کا حصہ ہے اور اس پروجیکٹ پر بعض ممالک میں سخت تنقید کی جا رہی ہے۔بعض خطوں، بطور خاص بھارت میں، اس شعبے سے منسلک لوگوں نے غصے کا اظہار کرتے ہوئے کہا کہ فیس بک اور ان کے شراکت داروں کو انٹرنیٹ کے بازار میں فروغ کا ناجائز موقع دیا گیا۔انٹرنیٹ ڈاٹ او آرجی دور دراز کے ناقابل رسا علاقوں میں انٹرنیٹ کی سہولیات پہنچانے کے لیے مختلف طریقوں پر کام کر رہا ہے۔ حال ہی میں کمپنی نے کہا تھا کہ وہ کس طرح انٹرنیٹ کنکٹیویٹی کے لیے مخصوص قسم کے ڈرونز کا استعمال کرنے کا منصوبہ بنا رہی ہے۔مارک زوکربرگ نے لکھاکہ گذشتہ سال فیس بک انٹرنیٹ تک رسائی بہم پہنچانے کے لیے طیاروں اور سیٹلائٹ کے استعمال کے بارے میں مختلف طریقوں پر غور کررہا تھا۔