اسلام آباد (این این آئی)رہنما پاکستان تحریک انصاف لطیف کھوسہ نے کہا ہے کہ شہباز شریف نے نواز شریف کو دھوکا دے کر وزارت عظمٰی چھین لی۔ہائی کورٹ کے باہر میڈیا سے گفتگو کرتے ہوئے انہوں نے انکشاف کیا کہ نواز اور شہباز شریف کا آپس میں جھگڑا چل رہا ہے، ایک طرف نواز شریف کا گروپ ہے جس میں رانا ثنااللہ، خرم دستگیر اور سعد رفیق اور جاوید لطیف ہیں، یہ گروپ کہتا ہے کہ ہم سے حساب نا لینا یہ ہماری حکومت نہیں ہے، نواز شریف ہوگا تو ہماری حکومت ہوگی، انہوں نے خود کو الگ کرلیا شہباز شریف سے۔
انہوں نے کہاکہ شہباز شریف کسی اور کی گود میں چلے گئے ہیں، یہ حکومت کسی اور کی فرمائش پر چل رہی ہیں، نا وزیر خزانہ ان کا ہے، نا وزیر داخلہ ان کا ہے، ہم نے تو دیکھ لیا ہے کہ کس کی حکومت یہاں چل رہی ہے۔انہوں نے کہا کہ نواز شریف کاروباری آدمی ہیں، وہ کاروبار کرنے آتے ہیں، انہوں نے پاکستان کو کاروباری حب بنا دیا، یہاں سے مفاد اٹھا کر وہ واپس لندن روانا ہوجائیں گے،نواز شریف تو سپریمو ہیں۔
