اسلام آباد(نیوز ڈیسک)اپنی بیٹی کے قتل کے الزام میں گرفتار سابق بھارتی میڈیا ٹائیکون اندرانی مکھرجی نے مبینہ طور پر خود کشی کی کوشش کی ہے۔ اسپتال میں ان کی حالت تشویش ناک ہے اور ڈاکٹروں کے مطابق آئندہ 48 گھنٹے اہم ہیں ۔اندرانی مکھر جی پر اپنی بیٹی شینا بورا کو 2012 میں جائیداد کے تنازع پر قتل کرنے کا الزام ہے ۔ پولیس نے انھیں 25 اگست کو حراست میں لیا تھا اور ان دنوں وہ عدالتی ریمانڈ پر جیل میں ہیں ۔گزشتہ روز اندرانی مکھرجی کو حالت خراب ہونے پر جیل سے ممبئی کے ایک اسپتال لایا گیا ۔ ڈاکٹروں کے مطابق ان کی حالت دوا کی زیادہ مقدار لینے سے بگڑی ۔ وہ مسلسل بے ہوشی کی حالت میں ہیں اور آئندہ اڑتالیس گھنٹے اہم ہیں ۔ابھی یہ واضح نہیں ہے کہ اندرانی مکھر جی نے خودکشی کی کوشش کی یا غلطی سے زیادہ دوا استعمال کی۔