اسلام آباد (نیوز ڈیسک) عمران خان کیخلاف شاہد آفریدی کے بیانات سوشل میڈیا پر وائرل،سابق ٹیسٹ کرکٹر وضاحت دینے کے لیے میدان میں آگئے۔تفصیلات کے مطابق سوشل میڈیا پلیٹ فارم ایکس پر گذشتہ کچھ دنوں سے شاہد آفریدی سے منسوب بیانات جنگل میں آگ کی طرح پھیل رہے ہیںجس میں وہ پی ٹی آئی کے بانی اور سابق وزیراعظم عمران خان اور اُن کے حامیوں پر تنقید کر رہے ہیں۔
شاہد خان آفریدی سے منسوب بیان جو تیزی کے ساتھ وائرل ہوا وہ یہ ہے کہ ’9 مئی کے واقعات میں ملوث کرداروں کو نشان عبرت بنا دو، چاہے کپتان ہو یا پوری ٹیم۔‘ شاہد آفریدی سے منسوب یہ بیانات وائرل ہونے کے بعد پی ٹی آئی فالوورز سوشل میڈیا پرسابق کپتان کو شدید تنقید کا نشانہ بنا رہے ہیں جس کے بعد ’بوم بوم آفریدی‘ کی جانب سےجاری کرنا پڑ گئی۔
ایسے جعلی بیانات کے وائرل ہونے کے بعد شاہد آفریدی کے اپنے آفیشل اکاؤنٹ سے ٹویٹ میں وضاحت جاری کرتے ہوئے لکھا کہ ’بار بار میرے نام سے جعلی پوسٹ، خبریں بنانے والوں سے التماس ہے کہ اپنی توانائیاں کسی مثبت کام میں لگائیں جو اگر کسی اور نہیں کم سے کم اُن کے اپنے لیے تو فائدہ مند ثابت ہو۔‘انہوں نے مزید لکھا کہ ’مجھے اگر کوئی بات کرنی یا بیان دینے کی ضرورت ہوئی تو اُس کے لیے میڈیا اور میرا ’ایکس‘ (ٹوئٹر) ہینڈل موجود ہے۔‘
