رائے ونڈ( این این آئی) سربراہ عوامی مسلم لیگ وسابق وفاقی وزیر شیخ رشید احمد نے رائیونڈ میں جاری عالمی تبلیغی اجتماع میں شرکت کی ۔ جمعہ کے روز سماجی رابطے کے پلیٹ فارم ایکس پر شیخ رشید احمد کی جانب سے تبلیغی جماعت کے اجتماع میں شرکت کی ویڈیوز اور تصاویر جاری کی گئیں ۔ایکس پر جاری کردہ ویڈیوز کے کیپشن میں تحریر کیا گیا کہ سابق وفاقی وزیر داخلہ شیخ رشید احمد کی رائیونڈ تبلیغی اجتماع میں شرکت ۔

ویڈیو میں شیخ رشید احمد کو اجتماع کے دیگر شرکا کے ساتھ چلتے دیکھا گیا جبکہ اس موقع پر انہوں نے سر پر سفید رنگ کی ٹوپی بھی پہن رکھی تھی۔اجتماع میں شرکت کے موقع پر وہاں موجود شرکاء کی جانب سے سابق وفاقی وزیر کے ساتھ سیلفیاں بھی بنائی گئیں۔یاد رہے کہ شیخ رشید احمد گزشتہ ماہ چند روز غائب رہنے کے بعد اچانک ایک ٹی وی پروگرام میں شریک ہوئے اور انہوں نے اپنے غائب رہنے کی وجہ بتاتے ہوئے کہا تھا کہ وہ 40 روزہ چلے پر گئے تھے۔

جبکہ سربراہ عوامی مسلم لیگ نے گزشتہ ہفتے لال حویلی سے متعلق کیس کا فیصلہ آنے کے بعد میڈیا سے گفتگو میں کہا تھا کہ عدالتی حکم کے بعد لال حویلی کو ڈی سیل تو کر دیا گیا ہے تاہم میں اپنی رہائش گاہ جانے سے پہلے تبلیغی اجتماع میں شرکت کروں گا۔