اٹک(این این آئی)غیرقانونی مقیم غیرملکی کے خلاف کریک ڈائون کے دوران 272افغان شہریوں کو گرفتار کر لیاگیا۔ضلع اٹک کے مختلف علاقوں سے 272غیر قانونی افغان شہریوں کو پکڑ کر ضلع میں قائم مختلف ہولڈنگ سینٹرز میں منتقل کر دیا گیا۔ سرکاری ذرائع کے مطابق اٹک سٹی سرکل سے 42غیر دستاویزی افغان شہریوں کو گرفتار کیا گیا،تحصیل حضرو سے 35، فتح جنگ اور نیو ایئرپورٹ تھانے کی حدود سے 14، 14غیر قانونی مقیم افغان باشندے گرفتار کیے گئے جبکہ باہتر سرکل سے 9 کو گرفتار کیا گیا۔

تحصیل حسن ابدال میں 82کے قریب غیر دستاویزی اور غیر قانونی افغان تارکین وطن کو شہری اور دیہی علاقوں سے پکڑ کر ہولڈنگ سنٹرز میں منتقل کیا گیا۔ باقی کو جنڈ، پنڈیگھیب انجرا، بسال اور ضلع کے دیگر حصوں سے پکڑا گیا۔ ضلعی انتظامیہ کے ایک آفیسر نے نوجوان صحافی ایم احسان قریشی کو بتایا کہ جن افراد کو ہولڈنگ سینٹرز میں منتقل کیا گیا ہے ان میں بچے اور خواتین بھی شامل ہیں۔ انہوں نے کہا کہ نادرا اور ایف آئی اے نے ان کی شناخت اور رجسٹریشن کی تصدیق کیلئے اپنا الگ سیل قائم کیا ہے اور اب تک کے تصدیقی عمل میں 30افغان باشندے غیر قانونی مقیم ٹھہرے ہیں جبکہ باقی کا عمل جاری ہے۔