راولپنڈی(این این آئی)چیئرمین پی ٹی آئی کو اڈیالہ جیل میں حاصل سہولتوں کی تفصیلات سامنے آئی ہیں جن کے مطابق جیل میں 8کمرے ان کے زیر استعمال ہیں۔چیئرمین پی ٹی آئی کے کھانے اور علاج کیلئے 9ڈاکٹر ڈیوٹی پر ہیں،چیئرمین پی ٹی آئی کو 10ٹی وی چینل دکھائے جاتے ہیں،ہر گھنٹے بعد چینل تبدیل کر دیا جاتا ہے۔ذرائع نے بتایاکہ چیئرمین پی ٹی آئی کو بیڈ، میٹرس اور اخبار کی سہولت بھی دی گئی ہے، ورزش کرنے کیلئے سائیکل اور لوہے کا راڈ بھی لگایا گیا ہے، جیل میں واک کرنے کیلئے 20فٹ کا صحن بھی موجود ہے۔

اڈیالہ جیل میں پی ٹی آئی چیئرمین کو کھانا پکانے کیلئے باورچی دیا گیا ہے، عام قیدیوں کا کھانا انہیں نہیں دیا جاتا، چیئرمین پی ٹی آئی کی خواہش کے مطابق بھی کھانا پکا کر دیا جاتا ہے۔ذرائع کے مطابق قیدی کے اکائونٹ سے کھانے پکانے کی اشیا باہر سے منگوائی جاتی ہیں،چیئرمین پی ٹی آئی کی سیکیورٹی کیلئے باہر سے پکا ہوا کھانا دینے کی اجازت نہیں۔