کراچی(این این آئی)بینک دولت پاکستان کی جانب سے یہ وضاحت کی جاتی ہے کہ اسٹیٹ بینک آف پاکستان ایکٹ 1956 کے ذیلی سیکشن کے تحت اسٹیٹ بینک کی طرف سے جاری کردہ تمام بینک نوٹ بشمول یادگاری نوٹ درج رقم کے اعتبار سے وفاقی حکومت کی ضمانت کے حامل اور پاکستان بھر میں (لیگل ٹینڈر)قانونی طور پر استعمال کیے جاسکتے ہیں
لہذا عوام کی معلومات کے لیے مطلع کیا جاتا ہے کہ 14 اگست 2022 کو پاکستان کے 75 ویں یومِ آزادی کے موقع پر جاری کردہ 75 روپے (بیشتر سبز رنگ کا حامل)کا نوٹ اور اسٹیٹ بینک کے قیام کے 75 سال مکمل ہونے پر 04 جولائی 2023 کو جاری ہونے والا 75 روپے (بیشتر نیلے رنگ کا حامل)کا نوٹ پورے پاکستان میں لیگل ٹینڈر (قانونی طور پر قابلِ استعمال)ہے۔مذکورہ بینک نوٹوں کو تبادلے کے ذریعے یعنی نجی اور سرکاری واجبات کے تصفیے کے لیے یکساں طور پر استعمال کرنے کی اجازت ہے۔ اس کے ساتھ ساتھ اسٹیٹ بینک اور تمام کمرشل بینک یہ نوٹ عوام کو جاری اور ان سے قبول کریں گے۔
