اسلام آباد(این این آئی)نگراں وزیراعظم انوار الحق کاکڑ نے کہا ہے کہ انتخابات میں کسی کی حمایت کریں گے اور نہ ہی کسی کیلئے ادارہ جاتی مداخلت ہوگی، پی ٹی آئی کے جو لوگ ٹھیک ہیں وہ قانونی دائرے میں رہ کر الیکشن لڑیں گے۔نگراں وزیراعظم نے سینئر صحافیوں سے گفتگو کرتے ہوئے کہا کہ میرے پاس پونے تین ماہ رہ گئے ہیں،ہم صرف الیکشن کرانے آئے ہیں، میری گفتگو پر مسلسل باتیں کی جاتی ہیں، مجھے وضاحتیں دینے کی ضرورت نہیں ہے۔انہوں نے کہا کہ پی ٹی آئی قانونی جماعت ہے جو لوگ ٹھیک ہیں وہ قانون کے دائرے میں رہ کر الیکشن لڑیں گے۔انوار الحق کاکڑ نے کہا کہ میں کوئی مغل بادشاہ ہوں جو کہوں کوئی لڑے گا یا نہیں، ہم کسی کو فیور دیں گے نہ ہی کسی کیلئے ادارہ جاتی مداخلت ہوگی۔
غیر قانونی مہاجرین کے حوالے سے انوار الحق کاکڑ نے کہا کہ صرف ان افغان مہاجرین کو نکال رہے ہیں جو رجسٹرڈ نہیں ہیں۔انہوںنے کہاکہ الیکشن میں اس جماعت کو ووٹ دوں گا جو معاشی بحالی کا پلان دیگی جس کے پاس معاشی بحالی کا پلان نہیں وہ عوام سے بے ایمانی کرے گا۔انہوں نے کہا کہ مولانا فضل الرحمان نگران حکومت کے ترجمان نہیں، انتخابات کا فیصلہ محکمہ موسمیات کی مشاورت سے نہیں ہو گا۔انہوکںنے کہاکہ الیکشن کمیشن بتائے گا کہ انتخابات کب ہوں گے، آئینی طور پر ہمارا فرض ہے کہ الیکشن کمیشن کی مدد کریں۔انہوںنے کہاکہ جیسے باقی پاکستان عام انتخابات کاانتظار کر رہا ہے ہم بھی کر رہے ہیں۔
