لاہور( این این آئی)امیر جماعت اسلامی سراج الحق نے کہا ہے کہ فلسطینی ظلم اور ظالمانہ قبضے کے خلاف لڑ رہے ہیں اور مسلمان حکمران ڈر رہے ہیں، امریکہ نے اسرائیل کا ساتھ دیا لیکن مسلم دنیا خاموش تماشائی بنی ہوئی ہے ،ہم بیت المقدس کی آزادی تک فلسطینیوں کے ساتھ کھڑے ہیں،پاکستان کی قوم حماس کے ساتھ ہر طرح کے تعاون کے لیے تیار ہے ،صدر، وزیراعظم اور آرمی چیف سے کہنا چاہتا ہوں پاکستان نظریاتی ملک ہے ،پاکستان کے بانی قائداعظم نے اسرائیل کو ناجائز ریاست قرار دیا تھا،قائداعظم محمد علی جناح رحمتہ اللہ نے پہلے دن سے فلسطینیوںکا ساتھ دینے کا اعلان کیا ،پاکستان ہمیشہ اسرائیل کے مقابلے میں فلسطینیوں کا ساتھ دے گا ،اس وقت 57 اسلامی ممالک کو حماس کا ساتھ دینا چائیے ،اقوام عالم مظلوم فلسطینیوں کا ساتھ دیں ،مسلم دنیا کی غیرت کے امتحان کا وقت ہے فلسطین کی آزادی کا سورج جلد طلوع ہو گا، مسجد اقصیٰ مسلمانوں کا مقدس مرکز ہے مسجد اقصی کی حفاظت کے لیے جینا اور مرنا عظیم جہاد ہے ۔

ان خیالات کا اظہار انہوں نے تیمرگرہ میں سات روزہ فہم قرآن و سنت کلاس کے آخری دن خطاب کرتے ہوئے کیا۔ اس موقع پر مولانا محمد اسماعیل نے درس قرآن دیا پروگرام ہزارواں افراد نے شرکت کی۔امیر جماعت اسلامی سراج الحق نے کہا ہے کہ ہمیں موقع ملا تو ہم سب سے پہلے قرآن و سنت کا نظام لائیں گے۔دنیا کی طاغوتی طاقتیں پاکستان کو اسلام کا قلعہ بنتے ہوئے نہیں دیکھنا چاہتیں، یہ سارے لوگ آئی ایم ایف کے غلام، ٹرانسجنڈر بل منظور کروانے والے لوگ کوئی تبدیلی نہیں لا سکتے۔انہوں نے کہا ہمارے سینکڑوں لوگ پارلیمنٹ میں رہے لیکن کسی ایک پر کرپشن کا کوئی الزام نہیں، پاکستان میں کرپشن فری جماعت صرف جماعت اسلامی ہے، ہم پاکستان سے سودی نظام ختم کریں گے، ہم بے روزگاروں کو روزگار الاؤنس دیں گے، بوڑھوں کو الاؤنس دیں گے۔امت مسلمہ کے مسائل کا حل حضور پاکۖ کی مکمل اتباع میں ہے، قرآن کی تعلیمات عام ہوں گی تو ہی معاملات زندگی میں برکت آئے گی ۔

امیر جماعت اسلامی نے کہا کہ فلسطینی عوام جو ایک طویل عرصے سے ارض فلسطین کی آزادی اور مسجد اقصی کی حفاظت کے لیے جو جدوجہد کر رہے ہیں، اس پر پوری امت مسلمہ ان کو سلام پیش کر رہی ہے۔ مسلم ممالک اس مشکل گھڑی میں فلسطینیوں کو تنہا چھوڑنے کے بجائے ان کا بھرپور ساتھ دیں۔سراج الحق نے کہا کہ قرضوں کی معیشت اور سودی نظام کے ہوتے ہوئے بہتری نہیں آ سکتی۔ عوام کو ریلیف دیا جائے، بجلی کے ٹیرف میں فی الفور کمی کا مطالبہ کرتے ہیں، اشیائے خورونوش اور پٹرول کی قیمتیں کم کی جائیں، جماعت اسلامی عوام کے حقوق کی آواز اور ملک کی امید ہے، ہم ہرحال میں پرامن احتجاجی تحریک جاری رکھیں گے۔