اسلام آبا د(این این آئی)وفاقی وزیر برائے تعلیم و پیشہ ورانہ تربیت مدد علی سندھی نے پیرا کو حکم دیا ہے کہ پرائیویٹ اسکولوں کی سالانہ رجسٹریشن کیلئے 10 فیصد نیڈ بیسڈ سکالرشپس لازمی بنائے۔وفاقی وزیر برائے تعلیم و پیشہ ورانہ تربیت مدد علی سندھی اور پیرا کی چیئرپرسن ڈاکٹر سیدہ ضیاء بتول کے درمیان پیر کو ملاقات ہوئی۔ وفاقی وزیر تعلیم مدد علی سندھی کے آرڈر کے تحت وفاق میں دس فیصد نیڈ بیسڈ سکالرشپس تمام پرائیویٹ سکولز کی رجسٹریشن کا مینڈیٹری پارٹ بنا دیا گیا۔

گزشتہ دنوں وفاقی وزیر نے پرائیویٹ ایجوکیشنل انسٹیٹیوشنزریگیولیٹری اتھارٹی (پیرا) کو حکم دیا تھا کہ دس فیصد نیڈ بیسڈ سکالرشپس تمام پرائیویٹ سکولز کو دینی چاہیے۔ وفاقی وزیر کو بتایا گیا کہ اس آرڈر پر عمل درآمد کیا جا چکا ہے، اب ہر سال پیرا سے رجسٹریشن کروانے کہ لیے پرائیویٹ سکولز پر لازم ہوگا کہ وہ دس فیصد طالب علموں کو نیڈ بیسڈ سکالرشپس دیں۔ مدد علی سندھی نے کہا کہ یہ ہم سب کی ذمہ داری ہے کہ ہر طبقہ کو ساتھ لے کر چلیں۔ انہوں۔ نے کہا کہ ہر بچے کی تعلیم ہماری ذمہ داری ہے جسے ہم پوری ایمانداری سے پورا کریں گے۔ اسلام آباد میں 1400 پرائیویٹ سکولز ہیں جو اس پر عملدرآمد کریں گے۔