جہلم (این این آئی) جہلم کے علاقے کالا گجراں میں رکشہ ڈرائیور نے ساتھیوں کیساتھ مل کر لڑکی کو زیادتی کا نشانہ بناڈالا۔ پولیس کے مطابق جہلم کے علاقے کالا گجراں سے 24ستمبر کو 16سالہ لڑکی اغوا ہوئی تھی،لڑکی کے والد کی مدعیت میں اغواء کا مقدمہ درج کیا گیا تھا۔پولیس حکام نے بتایا کہ لڑکی بازیاب ہوگئی ہے جس نے بتایا ہے کہ رکشہ ڈرائیور نے اپنے دو دیگر ساتھیوں کے ساتھ مل کر اسے زیادتی کا نشانہ بنایا ہے، ابتدائی رپورٹ کے مطابق لڑکی سے زیادتی کی تصدیق ہو گئی ہے۔

حکام کے مطابق رات گئے ملزمان لڑکی کو پھینک کر فرار ہوگئے، لڑکی نے گھر پہنچ کر بتایا کہ اس کی رکشہ ڈرائیور سے فون پر دوستی ہوئی تھی، رکشہ ڈرائیور نے ویران جگہ لے جا کر دوستوں کے ہمراہ اس سے زیادتی کی، تاہم لڑکی کو رکشہ ڈرائیور سمیت کسی کا نام پتا معلوم نہیں۔پولیس حکام کے مطابق موبائل فون کے ذریعے ملزمان کا سراغ لگارہے ہیں، جبکہ میڈیکل رپورٹ کے بعد مقدمے کی دفعات تبدیل کی جارہی ہیں۔