سوات(این این آئی)پاکستان تحریک انصاف پارلیمنٹرین کے سربراہ پرویز خٹک نے کہا ہے کہ عمران خان کا ساتھ نہ دیتا تو وہ کبھی حکومت نہیں بناسکتے تھے۔سوات میں پی ٹی آئی پی کی شمولیت تقریب سے خطاب میں پرویز خٹک نے پی ٹی آئی حکومت سے متعلق بڑا دعویٰ کیا اور کہا کہ عمران خان کا ساتھ نئے پاکستان کیلئے دیا تھا۔انہوں نے کہا کہ حکومت میں آکر چیئرمین پی ٹی آئی کا رویہ بدل گیا، عمران خان کی حکومت ترقی لاتی تو آج پنجاب کی یہ حالت نہ ہوتی۔
پی ٹی آئی پی کے سربراہ نے کہا کہ چیئرمین پی ٹی آئی کا ساتھ نہ دیتا تو وہ کبھی حکومت نہیں بناسکتے تھے۔انہوںنے کہاکہ پی ڈی ایم نے کم وقت میں تاریخی لوٹ مار کی ہے، عوام لوٹ مار کرنے والوں کو مسترد کرکے ہمارا ساتھ دیں۔پرویز خٹک نے کہا کہ الیکشن ہوجاتے ہیں تو پارٹیوں کا منشور غائب ہوجاتا ہے، ہم نے سوچا کب تک دوسروں کے پیچھے چلیں گے۔ ہماری پارٹی کا منشور امن ترقی و خوشحالی ہے، اپنی پارٹی میں اپنی مرضی کے فیصلے کریں گے۔
