لاہور ( این این آئی) جنرل ہسپتال لاہور کی چھت سے 22 سالہ لڑکی نے مبینہ طور پر چھلانگ لگا دی جس کی حالت تشویشناک بتائی جا رہی ہے ،معاملے کی تحقیقات کے لیے 3 رکنی کمیٹی تشکیل دے دی گئی۔تفصیلات کے مطابق قصور کی رہائشی 22سالہ سدرہ نامی مریضہ نے چھت سے چھلانگ لگا کر خودکشی کی کوشش کی، پانچ روز سے گائنی وارڈ میں داخل تھی، سدرہ نے پہلی منزل کے واش روم سے نیچے چھلانگ لگا دی جس کے باعث وہ شدید زخمی ہوگئی۔

ذرائع نے بتایا ہے کہ لڑکی زخمی حالت میں ہسپتال میں زیر علاج ہے، جہاں اسکی حالت نازک بتائی جاتی ہے، واقعہ کی اطلاع ملنے پر مقامی پولیس نے بھی موقع پر پہنچ قانونی کارروائی کا آغاز کر دیا ہے۔پروفیسر ڈاکٹر فرید ظفر کے مطابق ابتدائی رپورٹ کے مطابق یہ خودکشی کی کوشش لگتی ہے۔ڈاکٹر ندرت سہیل نے بتایا کہ مریضہ کا سی سیکشن ہوا تھا، گوشت کا ٹکڑا رہ گیا تھا جس کا آپریشن ہونا تھا۔ڈاکٹر کے مطابق مریضہ کی حالت شویشناک ہے۔ 3رکنی کمیٹی معاملے کی مزید تحقیقات کررہی ہے۔