لندن (این این آئی)سابق وزیر خزانہ اور مسلم لیگ (ن )کے مرکزی رہنما سینیٹر اسحاق ڈار نے چیئرمین پیپلز پارٹی کی تنقید پر ردعمل میں کہا ہے کہ بلاول میرے لیے بیٹے کی طرح ہے اس لیے اس پر کچھ نہیں کہوں گا۔سپریم کورٹ کی جانب سے نیب قوانین میں کی گئی ترامیم ختم کرنے اور نواز شریف کی واپسی کے حوالے سے سینیٹر اسحاق ڈار نے کہا کہ 62 ون ایف بل پارلیمنٹ اور صدر کی منظوری کے بعد قانون بن چکا، اس قانون کے تحت نااہلیت کا دورانیہ 5 سال ہے، اس قانون سے نواز شریف اور جہانگیر ترین سمیت دیگر افراد مستفید ہوئے۔

انہوں نے کہا کہ دوسرے مشترکہ کیس میں مریم نواز کی بریت ہو چکی ہے، نواز شریف کی پاکستان آمد اور الیکشن میں حصہ لینے میں کوئی رکاوٹ نہیں ہے، ان کی پاکستان آمد فقیدالمثال استقبال ہوگا۔پیپلز پارٹی کے چیئرمین بلاول بھٹو زرداری کی جانب سے ن لیگ پر دبے الفاظ میں کی گئی تنقید پر اسحاق ڈار نے کہا کہ بلاول میرے لیے بیٹے کی طرح ہے اس پر کچھ نہیں کہنا چاہتا، پیپلز پارٹی کے ساتھ 17 ماہ تک اتفاق رائے سے فیصلے کیے۔ اسحاق ڈار نے کہا کہ استحکام پاکستان پارٹی سے اتحاد کی باتیں قبل از وقت ہیں، مسلم لیگ ن کو موقع ملا تو 2013 والا پاکستان بنانے کی کوشش کریں گے۔