مکوآنہ (این این آئی)کرسچن بزنس مین فیلو شپ نے سانحہ جڑانوالہ میں جن بچیوں کے جہیز کا سامان جل کر راکھ ہوا،یا پھر شرپسند عناصر نے لوٹ لیا تھا ان بچیوں کی اجتماعی شادیاں کرانے کا اعلان کردیا۔کرسچن بزنس مین فیلو شپ کا ایک اجلاس سلیم شاکر کی صدارت میں منعقد ہوا،جس میں سینئر نائب صدر تیمور سندھو،سیکرٹری جنرل سہیل عالم،فنانس سیکرٹری کاشف سجن،کاشف نعمت چوہدری ایڈووکیٹ،گلوبل سہوترا ایسوسی ایشن کے مرکزی صدر دائودشریف سہوترا،اوورفلوئنگ مرسی فائونڈیشن کے سابق ڈائریکٹر وکٹر لعل،سماجی رہنما انعام الحق سلیم،لاہور چیمبر آف کامرس اینڈ انڈسٹری کی ہیومن رائٹس کمیٹی کی ایگزیکٹو ممبر سلومی شارون اور لاہور چیمبر آف کامرس اینڈ انڈسٹری کی ویمن ٹیکنیکل ٹریننگ کنونیئرصائمہ سموئیل نے شرکت کی۔
اجلاس میں فیصلہ کیا گیا کہ گزشتہ مہینے فیصل آباد کی تحصیل جڑانوالہ میں شر پسند عناصرنے چرچ اور مکانات کو آگ لگا دی تھی جبکہ درجنوں گھروں میں توڑ پھوڑ اور لوٹ مار کی گئی تھی جس کے نتیجے میں بچیوں کے جہیز کا سامان جل کر راکھ ہوگیا تھا،کرسچن بزنس مین فیلو شپ نے ان اداس اور مایوس چہروں پر مسکراہٹیں بکھیرنے کیلئے اجتماعی شادیاں کرائی جائیں گی اورسانحہ جڑانوالہ کی بیٹیوں کو عزت اور وقار کے ساتھ مکمل جہیز کاسامان بطور گفٹ دیکر رخصت کیا جائے گا۔
کرسچن بزنس مین فیلو شپ کے صدر سلیم شاکر کا کہنا تھا کہ اجتماعی شادیوں کی پُر وقار اور دلکش تقریب میں کاروباری،شوبز انڈسٹری، سیاسی،سماجی اور مذہبی شخصیات بطور مہمان شرکت کریں گی،تقریب میں دولہا اور دلہن کے رشتہ داروں سمیت ایک ہزار کے قریب مہمان شرکت کریں گے جن کی تواضح پرتکلف کھانے سے کی جائے گی،اجتماعی شادیوں کی یہ تقریب سانحہ جڑانوالہ کے متاثرہ خاندانوں کو حقیقی خوشی دینے کی خوبصورت کاوش ثابت ہوگی۔گلوبل سہوترا ایسوسی ایشن کے مرکزی صدر دائودشریف سہوترا کا کہنا تھا کہ اجتماعی شادیوں کا انتظام ہم سب ملکر کریں گے، جس کا بنیادی مقصد متاثرین جڑانوالہ کے زخموں پر مرہم رکھنا اور غم ذدہ خاندانوں کو خوشیاں فراہم کرنا ہے۔
