اسلام آباد(نیوز ڈیسک) پاکستان نے افغان طالبان کو متنبہ کیاہے کہ وہ افغانستان میں جاری اپنی لڑائی کیلئے پاکستانی سرزمین استعمال نہ کریں اور تشدد کرکے مذاکرات کا راستہ اختیار کریں ۔سفارتی ذرائع کے مطابق اس وارننگ کے بعد افغان طالبان سے تعلق رکھنے والے متعدد جنگجو ملک چھوڑ کر چلے گئے جس کی ہمارے اور سکیورٹی اداروں کے پاس اطلاعات ہیں ۔ ذرائع نے بتایا کہ پاکستان نے افغان حکومت پر بھی واضح کردیا ہے کہ اس کی سرزمین کا استعمال پاکستان کیخلاف کارروائی کیلئے ناقابل برداشت ہوگا۔تنبیہ کے باوجود بھی ملک نہ چھوڑ نے والے افغان طالبان کیخلاف کارروائی سے متعلق ایک سوال کے جواب میں ذرائع کا کہنا تھا کہ طاقت کے استعمال اور طالبان کیخلاف کارروائی کے علاوہ بھی کئی آپشن موجود ہیں ۔انہوں نے بتایا کہ ماضی میں افغان حکومت اور طالبان کے درمیان مذاکرات کیلئے ہم نے سہولت کار کا کردار ادا کیا ، تاہم اب پاکستان از خود کوئی اقدام نہیں اٹھائے اور اس کیلئے افغان حکومت کو پہل یا پھر پاکستان سے درخواست کرنا ہوگی ، انہیں فیصلہ کرنا ہوگا ۔ کہ اس نے مذاکرات کرنے ہیں یا پھر طاقت کا استعمال کرنا ہے ۔ ذرائع کا کہنا تھا کہ اگر افغان قیادت طاقت کا استعمال کرتی ہے تو بھی اسے پاکستان ، امریکا اور چین سے مشاورت کرنی چاہیئے ۔ طاقت کا استعمال اپنے نتائج پیدا کریگا۔ اور ایسی صورت میں طالبان کے الگ ہوجانے والے گروہ داعش میں بھی شامل ہوجائیں گے ۔ ذرائع نے مزید کہاکہ بڈھ بیر کیمپ پر دہشت گردی کے واقعے کی منصوبہ بندی افغانستان میں ہونے کے شواہد افغان صدر کے ساتھ شیئر کیے جائینگے کیوں کہ ان کی حکومتی رٹ کمزور ہے ، اور احتجاج کا کوئی فائدہ نہیں ۔