لاہور( این این آئی ) ترجمان محکمہ اینٹی کرپشن نے سابق وزیراعظم عمران خان کے الزامات پر اپنے رد عمل میں کہا ہے کہ عمران خان کی بہن اور بہنوئی کے خلاف الزامات حقیقت پر مبنی ہیں،جھوٹے الزامات یا بدزبانی سے عمران خان حقیقت کو جھٹلا نہیں سکتے۔

اینٹی کرپشن نے کبھی نہیں کہا کہ عظمی خان نے نومبر 2021 میں کوئی زمین خریدی،حقیقت یہ ہے کہ مارچ 2022 میں زمین کے انتقالات ہوئے جب عمران خان وزیراعظم تھے۔ ترجمان نے عمران خان کے بیان پر اپنے رد عمل میں کہا کہ نومبر 2022 میں حقیقی مالکان نے زبردستی بے دخلی پر جسٹس آف پیس کو درخواست دی،حقیقی مالکان نے درخواست میں عظمی خان اور ان کے شوہر کے خلاف مقدمہ درج کرنے کی استدعا کی، مالکان نے الزام لگایا کہ عظمی خان اور ان کے شوہر احد مجید انہیں زبردستی ملکیتی زمین سے بے دخل کر رہے ہیں،جسٹس آف پیس نے مالکان کے حق میں اور عظمی خان اور ان کے شوہر کے خلاف مقدمہ درج کرنے کا حکم دیا ۔عمران خان کو مشورہ ہے کہ وہ اپنی بہن اور بہنوئی پر اینٹی کرپشن میں درج ہونے والے مقدمہ میں شامل تفتیش ہونے پر زور دیں۔ اگر عمران خان کی بہن اور بہنوئی کے پاس اپنے دفاع میں ثبوت ہیں تو وہ تفتیشی ٹیم کے سامنے پیش کریں۔ اینٹی کرپشن کرپٹ عناصر کے خلاف بلاامتیاز کاروائیاں جاری رکھے گا۔