کراچی (این این آئی)سابق وفاقی وزیر خزانہ اور مسلم لیگ (ن)کے رہنما مفتاح اسماعیل نے کہاہے کہ اگر آئی ایم ایف کے ساتھ ڈیل ہو جاتی ہے تو ہو سکتا ہے کہ حکومت کو منی بجٹ لانا پڑے۔ خصوصی گفتگو میں مفتاح اسماعیل نے کہا کہ پی ڈی ایم حکومت آئی تو سابقہ حکومت نے آئی ایم ایف سے معاہدہ توڑا ہوا تھا، پچھلی حکومت نے ایک دو سال سے بجلی اور گیس کی قیمتیں نہیں بڑھائی تھیں۔

مفتاح اسماعیل نے کہا کہ اس وقت مہنگائی کا تناسب 35 فیصد ہے، کافی چیزیں مہنگی ہوئی ہیں، روٹی، چاول اور گندم مہنگی ہو چکی ہے عام آدمی کا گھر چلانا مشکل ہوگیا ہے، غریب طبقہ تو 75 سال سے پس رہا ہے اب مڈل کلاس بھی تکلیف میں آگیا، حکومت نے کچھ چیزیں اچھی کی ہیں مگر کچھ چیزیں مزید اچھی کر سکتے تھے۔سابق وزیر خزانہ نے کہا کہ رواں مالی سال کا ٹیکس ہدف 7500 ارب روپے تھا، گروتھ دیکھی جائے تو 9200 ارب روپے تک ہدف حاصل کیا جا سکتا ہے۔

انہوں نے کہا کہ نومبر میں آئی ایم ایف سے بات کر لیتے تو ڈالر بھی اتنا اوپر نہ جاتا، آئی ایم ایف معاہدے سے متعلق حکومت نے نومبر میں کچھ نہیں کیا، وفاق اور صوبے ترقیاتی پروگرام پر جو خرچ کرتے ہیں اس میں کمی کر دی جائے تو بہتر ہوگا۔انہوں نے کہاکہ ترقیاتی منصوبوں پر خرچوں میں کمی کی جائے تو وہ پیسہ کسی اور سیکٹر میں لگایا جا سکتا ہے، کسی بھی ادارے کی نجکاری کرنے میں 460 دن لگ جاتے ہیں، نجکاری کرنے کیلیے طویل عرصہ نہیں ہونا چاہیے، نجکاری ہوگی تو اس میں مقابلے کی سطح بن جائے گی جس سے فائدہ ہوگا۔