لاہور ( این این آئی) لاہور ہائی کورٹ نے ظل شاہ قتل کیس میں پاکستان تحریک انصاف کے چیئرمین عمران خان کی عبوری ضمانت منظور کر لی۔پی ٹی آئی کے سربراہ ہائی کورٹ میں سڑک حادثے میں پارٹی کے کارکن ظلِ شاہ کی موت کے حوالے سے حقائق اور شواہد کو چھپانے سے متعلق کیس میں اپنی درخواست ضمانت پر سماعت کے لیے پیش ہوئے، جسٹس انوار الحق پنوں نے درخواست ضمانت پر سماعت کی۔

سرکاری وکیل نے کہا کہ چیئرمین پی ٹی آئی شامل تفتیش ہوگئے ہیں جس پر عدالت نے کہا کہ کون کون سی دفعات کے تحت درخواستگزار کے خلاف مقدمہ ہے۔عدالت نے کہا کہ جو دفعات شامل کی گئیں ہیں وہ قابل ضمانت ہیں یا نہیں، اس پر سرکاری وکیل نے جواب دیا کہ جن مقدمات کے تحت درخواست گزار کا نام مقدمے میں شامل کیا گیا وہ قابل ضمانت ہیں۔سرکاری وکیل نے مقدمے کا ریکارڈ عدالت میں پیش کرتے ہوئے کہا کہ تفتیشی افسر کی تبدیلی کی وجہ سے تفتیش مکمل نہیں ہو سکی۔سماعت کے دوران عدالتی حکم پر شریک ملزم کابیان عدالت میں پڑھ کر سنایا گیا۔ عدالت نے سرکاری وکلاء سے استفسار کیا کہ مجھے آپ بتائیں، آپ تین پراسیکیوٹر کھڑے ہیں، آپ بتائیے آپ نے جو فرسٹ انفارمیشن رپورٹ (ایف آئی آر)پڑھی اس سے ان کا کیا تعلق بنتا ہے؟۔ عدالت نے ریمارکس دیئے کہ آپ چھوڑ دیں کہ ملزم کون ہے، صرف یہ دیکھیں کہ کیا ان کی ضمانت منسوخ ہوتی ہے؟۔ بعد ازاں لاہور ہائی کورٹ نے چیئرمین پی ٹی آئی کی عبوری ضمانت کنفرم کرتے ہوئے انہیں ایک لاکھ کے ضمانتی مچلکے جمع کرانے کی ہدایت کردی۔یاد رہے کہ 8مارچ کو لاہور میں پی ٹی آئی کی ریلی کے دوران دفعہ 144کی خلاف ورزی پر پولیس نے کریک ڈائون کیا تھا جبکہ اس دوران پی ٹی آئی کا کارکن علی بلال جاں بحق ہوگیا تھا۔

چیئرمین پی ٹی آئی عمران خان نے لاہور میں زمان پارک سے داتا دربار تک شیڈول ریلی کی منسوخی کے اعلان کے بعد سماجی رابطے کی ویب سائٹ ٹوئٹر پر الزام عائد کیا تھا کہ پارٹی کارکن علی بلال (ظل شاہ) کو پنجاب پولیس نے قتل کردیا ہے۔وزیر اعلی پنجاب نے واقعے کا نوٹس لیتے ہوئے مکمل غیر جانبدرانہ اور حقائق و شواہد پر مبنی انکوائری کرنے کا حکم دیا تھا۔