اسلام آباد (این این آئی) پاکستان مسلم لیگ (ق) کے سربراہ و سابق وزیر اعظم چوہدری شجاعت حسین نے کہا ہے کہ تحریک انصاف سے الگ ہونے والے تمام ارکان قومی و صوبائی اسمبلی کے لیے ہماری جماعت کے دروازے کھلے ہیں، لیکن صرف ورمحب وطن لوگوں کو قبول کریں گے،تحریک انصاف پر پابندی کیخلاف ہوں،چاہتا ہوں وہ انتہا پسندی کے راستے پر چلنے کی بجائے بات چیت کا راستہ اپنائے۔

نجی ٹی وی سے گفتگو کرتے ہوئے مسلم لیگ (ق) کے سربراہ چوہدری شجاعت نے کہا کہ پاکستان کی سلامتی کے لیے شہید ہونے والے پاک فوج کے جوان قوم کا فخر ہیں، ان شہدا کے خون کو ہر گز رائیگاں نہیں جانے دیا جائے گا۔انہوں نے کہا کہ تحریک انصاف کے کئی رہنماوں نے ہماری جماعت میں شمولیت کے لیے رابطہ کیا ہے، تمام ارکان قومی و صوبائی اسمبلی کے لیے ہماری جماعت کے دروازے کھلے ہیں، لیکن صرف محب وطن لوگوں کو قبول کریں گے،عنقریب بڑے نام ہماری جماعت میں شامل ہوتے نظر آئیں گے۔

ایک سوال کے جواب میں سینئر مسلم لیگی رہنما نے کہا کہ آخر تک پرویز الٰہی کے تحریک انصاف میں جانے کے خلاف تھا، اب بھی سمجھتا ہوں یہ ایک غلط سیاسی فیصلہ تھا، تاہم بطور جمہوری سیاستدان تحریک انصاف پر پابندی کیخلاف ہوں۔انہوں نے کہا کہ چاہتا ہوں تحریک انصاف انتہا پسندی کے راستے پر چلنے کے بجائے بات چیت کا راستہ اپنائے۔ چوہدری شجاعت حسین نے کہا کہ 9مئی کو پاک فوج نے دانشمندی کا فیصلہ کرکے ملک کو بڑے خون خرابے سے بچایا ہے جس کا تحریک انصاف کے کارکنوں نے ناجائز فائدہ اٹھایا۔چوہدری شجاعت نے کہا کہ ملک کے سیاسی و معاشی حالات کو سنبھالنے کے بعد حکومت الیکشن کی جانب جاسکتی ہے جس کے لیے ہم حکومت کی حمایت کریں گے۔