لاہور(این این آئی)انسداد دہشتگردی کی خصوصی عدالت نے نو مئی کو توڑ پھوڑ اور جلاؤ گھیراؤ کے الزام میں گرفتار تحریک انصاف کے رہنما میاں عباد فاروق سمیت 124 کارکنوں کو شناخت پریڈ کیلئے جیل بھیجتے ہوئے آئندہ سماعت پر شناخت پریڈ اور تفتیش سے متعلق رپورٹ طلب کرلی۔گزشتہ روز تین مختلف تھانوں کی پولیس نے ملزموں کو انسداد دہشتگردی کی خصوصی عدالت کے جج اعجاز بٹر کے سامنے پیش کیا۔

تھانہ سرور روڈ پولیس نے جناح ہاؤس میں توڑ پھوڑ اور جلا ؤ گھیراؤ کے کیس میں پی ٹی آئی رہنما میاں عباد فاروق سمیت 94، گلبرگ پولیس نے 22 اور مغلپورہ پولیس نے 7کارکنوں کو پیش کیا اور استدعا کی کہ ملزمان کی شناخت پریڈ کرانی ہے۔عدالت نے استدعا منظور کر تے ہوئے تمام ملزموں کو سات روز کیلئے جوڈیشل ریمانڈ میں جیل بھیج دیا۔ عدالت نے جوڈیشل ریمانڈ ختم ہونے پر ملزمان کو دوبارہ عدالت میں پیش کرنے کا حکم دیتے ہوئے شناخت پریڈ اورتفتیش سے متعلق رپورٹ بھی طلب کرلی۔

موضوعات:میاں عباد فاروق