اسلام آباد (این این آئی)پاکستان اور عالمی مالیاتی فنڈ کے درمیان سٹاف لیول معاہدے سے پہلے آئی ایم ایف نے نئے مطالبات سامنے رکھ دیئے۔ پاکستانی حکام کو آئی ایم ایف کو 2023تک 8ارب ڈالر قرضوں کی واپسی کے انتظامات پر مطمئن کرنا ہوگا۔ وزارت خزانہ کے مطابق مئی اور جون 2023 کے دوران پاکستان نے 3.7ارب ڈالر کا بیرونی قرض واپس کرنا ہے۔
ذرائع وزارت خزانہ کے مطابق آئی ایم ایف نے مزید 2.4ارب ڈالر کی یقین دہانی مانگی ہے، پاکستان کو چین سے مزید 2.4ارب ڈالر کے قرضوں کی واپسی کے لیے رول اورر یقینی بنانا ہوگا۔ پاکستان نے اس سے قبل چین سے 3ارب ڈالر کی فنڈنگ کی یقین دہانی کرائی تھی۔
ذرائع کے مطابق سعودی عرب سے 2ارب ڈالر کی فنڈنگ کی یقین دہانی کرائی گئی تھی جبکہ متحدہ عرب امارات سے 1 ارب ڈالر کی یقین دہانی کرائی تھی۔دوسری جانب آئی ایم ایف حکام نے پٹرولیم ڈویلپمنٹ لیوی ہدف سے کم جمع ہونے پر بھی عدم اطمینان کیا۔ وزارت خزانہ کے مطابق 9ماہ میں 362ارب 48کروڑ روپے کی پیٹرولیم لیوی وصول کی گئی جبکہ موجودہ مالی سال پیٹرولیم لیوی کی مد میں مجموعی طور پر 855ارب روپے وصولی کا ہدف ہے۔
