کراچی(نیوز ڈیسک) سلمان بٹ نے قومی کرکٹرزکے دل میں نرم گوشہ پانے کیلیے کوشش شروع کر دی، گذشتہ روز انھوں نے سابق کپتان شاہد آفریدی سے ملاقات کے دوران جذباتی انداز میں اپنی سابقہ غلطیاں تسلیم کرلیں۔تفصیلات کے مطابق اسپاٹ فکسنگ کیس میں سزا یافتہ سلمان بٹ، محمد عامر اور آصف کو اب تک قومی کرکٹرز نے معاف نہیں کیا ہے، اکیڈمی میں ٹریننگ کے دوران ویسے تو انھیں کسی کے سامنے آنے کی اجازت نہیں مگر ایسا ہوجائے تو اچھا ردعمل نہیں ملتا، اپنے لیے نرم گوشہ بنانے کیلیے سلمان بٹ نے تو باضابطہ کوششوں کا بھی آغاز کر دیا ہے، ذرائع نے بتایا کہ گذشتہ روز سابق کپتان نے نیشنل کرکٹ اکیڈمی لاہور میں ٹی ٹوئنٹی قائد شاہد آفریدی سے ملاقات کی، انھوں نے اس موقع پر تسلیم کیا کہ اسکینڈل سامنے آنے کے بعد غلطی تسلیم نہ کرنا غلطی تھی۔
ذرائع نے بتایا کہ سلمان خاصے جذباتی تھے اور کئی بار ان کی آواز بھرا بھی گئی، ماضی میں آفریدی نے انھیں کہا تھا کہ جو کچھ ہوا آئی سی سی اور بورڈ کو بتا دیں مگر سلمان بے گناہی پر اصرار کرتے رہے، البتہ اب انھوں نے اعتراف کیا کہ آفریدی کا مشورہ مان لیتے تو شاید ایسے دن نہ دیکھنے پڑتے، سابق اوپنر نے آفریدی سے کہا کہ ”آپ نے مجھے قومی ٹیم کا نائب کپتان بنوایا مگر میں توقعات پر پورا نہ اتر سکا جس پر شرمندہ ہوں“ انھوں نے دبے الفاظ میں آفریدی سے ٹیم میں واپسی کیلیے سپورٹ کرنے کاکہا، مگر ٹی ٹوئنٹی قائد نے واضح کر دیا کہ یہ بورڈ کا فیصلہ ہے اور وہ اس میں کچھ نہیں کر سکیںگے، البتہ اوپنر جہاں بھی ممکن ہو کرکٹ کھیلتے رہیں۔