لاہور( این این آئی)پاکستان مسلم لیگ (ن)کی چیف آرگنائزرمریم نوازنے کہا ہے کہ سامنے آنے والی آڈیوزسے ثابت ہوگیاکہ تخریب کاری کامنصوبہ عمران خان نے خود بنایا ہواتھا،حکومت کوان شرپسندوں سے کسی قسم کی رعایت نہیں برتنی چاہیے۔
سماجی رابطوں کی ویب سائٹ ٹویٹر پرایک پیغام میں مریم نوازنے عمران خان کی گرفتاری اوراس پر پی ٹی آئی کے کارکنوں کی جانب سے ملک بھر میں جلائو گھیرائو کے واقعات پرکہا کہ عوام نے کسی احتجاج کا حصہ بننے سے انکار کردیاہے اورفتنہ کی گرفتاری کے بعد پاکستان میں کہیں بھی عوام باہرنہیں نکلے،یہ عمران خان کی تخریبی سیاست کے منہ پر بہت بڑا طمانچہ ہے۔انہوں نے لکھا کہ عوام نے بھی پی ٹی آئی کے ان دہشتگردوں کواپنی آنکھوں سے دیکھ لیاہے،وہ تنصیبات مارک کی ہوئی تھیں جہاں گرفتاری کی صورت میں حملہ کیاجاناتھا،بلوائیوں کوپچھلے کئی ماہ سے زمان پارک میں ٹریننگ دی جارہی تھی،گرفتاری کے بعدصرف تربیت یافتہ بلوائی باہرآئے ہیں۔مریم نواز نے لکھا کہ آڈیوزسے ثابت ہوگیاتخریب کاری کامنصوبہ عمران نے خودبنایاہواتھا،حکومت کوان شرپسندوں سے کسی قسم کی رعایت نہیں برتنی چاہیے۔
