اسلام آباد (این این آئی)وفاقی وزیر برائے تعلیم و پیشہ ورانہ تربیت رانا تنویر حسین نے سینٹ کو بتایا ہے کہ اے اور او لیول سلیبس میں پڑھائی جانے والی کتابوں کیلئے اب این او سی لینا لازم ہے۔

جمعہ اجلاس میں اظہار خیال کرتے ہوئے انہوں نے کہا کہ اے لیول کے نصاب میں جن کتابوں میں غیراخلاقی مواد تھا ان کو ضبط کرلیا گیا ہے اورمتعلقہ حکام کو خط لکھ دیا ہے کہ آئندہ اس نظام کو جاری رکھنا ہے تو اے اور او لیول کی کتابوں کیلئے این او سی لینا لازم ہے۔وفاقی وزیر نے بتایاکہ لیبیا میں پاکستانی سکول میں نہ صرف پاکستانی کمیونٹی بلکہ مقامی بچے بھی تعلیم حاصل کرتے ہیں۔ وزیر برائے وفاقی تعلیم و پیشہ ورانہ تربیت رانا تنویر حسین نے کہا کہ لیبیا میں پاکستانی سکول میں تعلیمی سال 22-2021میں 1914بچوں جبکہ 23-2022 میں 1823بچوں نے داخلہ لیا۔ سکول کے اخراجات قومی خزانے سے ادا نہیں کئے جاتے بلکہ سکول انتظامیہ خود پورے کرتی ہے۔ انہوں نے کہا کہ تجربہ کار شخص کو سکول کا پرنسپل تعینات کیا گیا ہے۔